Ua 22 tausaga o faaaogāina pea e Samoa le vaaleoleo o le gataifale o le Nafanua na aumai i se fesoasoani a le Malo o Ausetalia i le tausaga e 1988.
O se fesoasoani a lea Malo i taimi o pulega a le alii Palemia o Bob Hawke. O le faamoemoe ia leoina ai ogasami faatulafonoina o atunuu o le Pasefika, ma faaaogā i galuega fesoasoani i taimi o faalavelave faalenatura aemaise o galuega laveai i le sami mo le sailia o vaa fagota tafefea.
Ua mae‘a nei feiloaiga i le va o le Matagaluega o Leoleo i Samoa o loo iai le vaaiga ma le faaaogāina o le Nafanua ma sui o le polokalame o le puipuiga a le Malo o Ausetalia ma ua toe faaopoopoina ai tausaga o fesoasoani a lea Malo mo le tausia ma le vaaia o le Nafanua.
E le gata ina faaauauina pea le fesoasoani a Ausetalia mo le faaleleia o le vaaleoleo ae ua tau fai malilie itu e lua e auina atu pea i le Kolisi maualuga o Launceston i Tasemania (Tasmania) alii vaa o le Nafanua e aooga ai.
E toa 19 le auvaa o le Nafanua o loo iai i le taimi nei i lalo o le taitaiga a le alii kapeteni le susuga i le satini sinia o Petone Mauga.
O le sunami na aafia ai se vaega o Samoa i le tausaga na tea nei na faaaogāina ai le Nafanua i le sailiga o tagata maliliu lea sa fesoasoani i ai ma se vaalele o le fitafita o le Malo Ausetalia.
O Samoa le atunuu muamua na faailoa ia Ausetalia lona manaomia o se vaaleoleo i lana polokalame o le puipuiga o ogasami faatulafonoina ma le leoina o gataifale o atunuu taitasi.
E manatua ai pea le vaitaimi o faigamalo a Samoa i le tausaga e 1987, lea na tulai mai ai le faigamalo soofaatasi a le afioga Vaai Kolone ma Tuiatua Tupua Tamasese Efi, na talia ai le Nafanua ona sa vavaō ai le Palemene i le aumai o le vaa ae lē lava ni tupe a le Malo e utu ai le suauu ma penisini. E lei tuu‘aulafo ai taitai o le Malo i lea vaitaimi i faitioga, ae na aumai lava le vaa.
Talu mai lea taimi ua oo mai i lenei vaitau ua atoa le 22 tausaga o le fesoasoani a Ausetalia, ma ua molimauina foi le tāua ma le aogā o le Nafanua i le tele o galuega laveai, aemaise o malaga a le Malo e le gata i Savaii ae o Amerika Samoa.
E ui lava foi ina faaaogā sese le vaa e aumai faananā ai le pusa fana a se tasi o tamalii sa avea ma Komesina o Leoleo, peitai e le avea ia masei e natia ai le tāua o le auaunaga ma le tautua o loo faia e le Nafanua.
E 15 tausaga ua toe faaopoopoina ai le malosi o le vaaleoleo ina ua mae‘a ona sainia se maliega ma le Malo o Ausetalia e togafiti ai pea le vaa ia umi pea tausaga o faaaogā.
E iai foi vaa faapea mo isi atunuu o le Pasefika e pei o Tonga ma Fiti, Kilipati ma le Atu Kuki. O Niu Sila o loo fesoasoani foi i le polokalame o le puipuiga o loo iai se sui o lona fitafita o loo galue mo le Nafanua.
