E ui lava i le tele o tuatuagia o lenei soifuaga, ae viia le Atua i avanoa o loo maua e faia ai ni galuega alofa e laveaina ai nisi o moomia le fesoasoani. O lenei faalapotopotoga i Kuiniselani o se lala o galulue ai nisi o faletua, tamalii ma alo o le atunuu e aunoa ma se totogi e tali atu i se manaomia.
O upu lava a le atunuu “Pa‘upa‘u ia ae oo i Lepea”, o le ā se taumafaiga lē ‘a‘u‘a‘u ae ona ua pau o se mea ua oo i ai le mafai e ala i galuega faasavali a le Toomaga mo ē Puapuagatia i Kuiniselani.
Pei ona silafia o le lala lea ua faavae i Kuiniselani sa tatalaina aloaia lava e le afioga i le alii Palemia ia Tuilaepa Sailele Malielegaoi i nai tausaga ua mavae lea na malaga mai ai ma sui o le HRPP i le latou malaga faalemalo.
Ua sauni atu le lala o Toomaga mo ē Puapuagatia i Kuiniselani i le latou suega seleni mo lenei tausaga auā so latou sao e fesoasoani ai i le Ofisa i Samoa o loo tausia ma puipuia fanau sauaina.
O lenei suega seleni o le a faia i le Aso Toonai, aso 7 o Mati 2015 i le Blue Fin Fishing Club 24 Lilac Street Inala. O le a faatasi uma ai faauluuluga o mafutaga taitasi i Brisbane aemaise le lautele o Samoa o loo alala ma papaaao i Brisbane e sootauau mo lenei faamoemoe.
E iai se fonotaga e usuia i Samoa e aofia uma ai lala o le Toomaga mo ē Puapuagatia i fafo mai o Samoa, lea foi e tuuvaa atu ai le Faatonu o le lala i Kuiniselani, le faletua ia Eseta Frost ma le Failautusi o Brenda Mauigoa i le aso 9 o Mati pe a mae‘a le faamoemoe i le Aso 7.
E lē gata i lea o seleni uma e maua mai i le suega seleni i lea po o le a malaga ma sui o le lala o Kuiniselani ma tauaao atu i le Peresetene ma le Ofisa o le Toomaga mo ē Puapuagatia i Samoa.
O le komiti lenei o loo faatautaia le Lala
Faatonu Toomaga mo ē Puapuagatia Kuiniselani – Eseta Frost
Failautusi – Brenda Kathyln Mauigoa
Teutupe – Poliana Magele
E momoli atu ai foi le agaga faafetai tele a le Peresetene ia Eseta Frost faapea le komiti e tusa ai ma le lagolago mai a le atunuu e lē gata o Kuiniselani aemaise soo se atunuu o loo maua le agaga fia fesoasoani.
O la le Tusi Sa, “Aua ne‘i tatou faapalapala i le amio lelei; aua o ona po e tatau ai tatou te selesele mai ai, pe afai tatou te le faavaivai.” (Efeso 6:9)
E mafai ona faafesootai le Peresetene ia Eseta Frost mo nisi faamatalaga o le Dinner lea e faia i le afiafi o le Aso Toonai aso 7 o Mati, i lana telefoni: 0413 159 959.
