Ua faamanuiaina se alo poo tamafanau a Samoa i le suega o le ‘Scholarship in Samoan Language’ Level 4, o le alii talavou lea o Kapeteni Polutea mai le Kolisi o Porirua, e pei ona ia sueina ai lea suega i le tausaga na tea nei, 2014.
O Kapeteni Polutea, sa avea ma Taitaiulu i alii (Head Boy) o le Kolisi i Porirua, ma o ia foi na sili aoao i le Vasega 13 (Dux) i le tausaga na tea nei. O ona tuaa o le tofa ia Seumanu Pita Polutea mai alalafaga o Satoalepai ma Sapapalii i Savaii, ma le faletua ia Sosefina Polutea mai i alalafaga o Leone, Moataa ma Lufilufi i Upolu.
O loo sauniuni atu nei Kapeteni Polutea e faaauau ana aoaoga i le Iunivesite i Vitoria, i Ueligitone. E lē taumate o le a faaauauina ai pea le aoaoina o lana Gagana Samoa. Faamalo faafetai i le taumafaiga a nei alo i le tauaveina o le tatou Gagana Samoa. Momoli atu foi le faamalo i le tapuaiga a mātua ma aiga.
