E lē o solomuli pe faavaivai le faiaoga ma le faiaoga lagolago o le ‘au lakapi taitoafitu a le Manu Samoa i le toe faia o isi tapenaga ma sauniuniga mo le isi taamilosaga fitu a le IRB e amatalia ia Novema.
E ui ina faapea ua see ifo i lalo o le tulaga 5 le au a Samoa, e faatusatusa i le numera tasi sa iai i le tausaga ua mavae ina ua siamupini i le taamilosaga fitu a le IRB, peitai e iai lava faaletonu na fetoai ma tapenaga o lenei tausaga ina ua toatele tama tuai o le ‘au na aafia i manu‘aga.
“Tasi lena mafuaaga o le faaletonu o le tatou ‘au, ae sa taumafai lava i le mea silisili mo le tapuaiga a le atunuu”.
O le finagalo lea o Steven Betham ina ua feiloai ma le vasega o alii ma tamaitai tusitala i le ofisa autū o le Iuni Lakapi Aoao a Samoa i Malifa i le Aso Gafua 6 o Iuni 2011, ina ua toe faaolatia mai le ‘au taitoafitu a le Manu Samoa i fanua i le mae‘a o le taamilosaga sa auai.
O le mau a le faiaoga e mafai ona toe ausia e le tatou ‘au taitoafitu le tulaga maualuga na iai i le tausaga ua mavae pe a toe silasila i faaletonu sa aafia ai tapenaga i le taamilosaga ua mae‘a, aemaise lava e ogaoga tele manu‘a o Lolo Lui, Mikaele Pesamino, ma Uale Ma‘i o nisi o tama e faamoemoe tele i ai auā ua masani i le faataaloina o le polo ma le faia o gaioiga poo moves e saofia ai se taumafaiga a le ‘au i le manumalo.
E lē o avea manu‘aga na aafia ai i latou ma lē mafai ai ona taaalo i nisi o vae o le taamilosag ua mae‘a ma mafuaaga o le aveesea ma fofoga o le faiaoga ma le faiaoga lagolago.
“Ua toe malolosi tama na manunu‘a ma ua mafai ona toe taaalo peitai sa lē mafai ona ave i ai se avanoa ona e mo‘i ua manuia o latou manu‘aga ae e manaomia le lava o le malosi ma le fitness e tāua”, na saunoa ai le faiaoga.
Na tele viiga o le ‘au lakapi taitoafitu a le Manu i le tausaga ua mavae ina ua taliu mai ma le Ipu o le Siamupini o le taamilosaga a le IRB. Sa maua foi a latou taui tupe mai le Malo aemaise o le aao mafola o le atunuu i meaalofa sa latou foai mo le ‘au ona o le agaga o le fiafia ua ausia e Samoa se tulaga maoae i le tala faasolopito o taamilosaga fitu a le IRB o le avea ma siamupini aoao i le lalolagi.
O le naunautaiga o le Ofisa Sili ma le pulega o le ‘au lakapi taitoafitu a le atunuu ia tumau pea le lagolago a le atunuu i ana tamafanau.
O le a iai nisi o tama o le ‘au e ono filifilia i le ‘au lakapi tele a le Manu Samoa auā le Ipu o le Lalolagi o loo sauni i ai i le masina o Oketopa lea e faia i Niu Sila.
