O le $20 miliona o loo lipotia o le aofaiga lea o se vaegatupe o loo nofo aitalafu ai aiga o Magiagi i le faalapotopotoga o le malosiaga tau eletise le EPC, i le 14 tausaga o mu fua e aunoa ma le totogiina o ni pili eletise, e lē o faigofie ona talia e le nuu.
O loo iai foi se talosaga a le afioaga i le Komiti a le Malo o loo silasila i le mataupu lenei, ina ia faamagalo se vaega o ia aitalafu tuua.
Mo le silafia e le aufaitau ina ua fefeu feutanaiga i le va o le nuu ma le Malo i se vaitaimi o le 1990 i le taui o latou eleele o loo faaaogā i le afi eletise mai le suavai faapea le suavai taumafa, e lei toe fuaina e fua mita a le EPC pili o eletise ina ua iai se gaioiga a matai o le nuu na latou faamata‘u ai le saogalemu o le aufaigaluega e ala i le teena ona toe ulufale i laoa ma maota e fua mita.
Talu mai lea vaitaimi lea ua 14 nei tausaga sa mu fua le nuu, ae o loo totogi eletise a aiga uma o le atunuu.
E manino mai i finagalo o le taitai o le Malo i le alii Palemia, Susuga Tuilaepa Lupesoliai Sailele Malielegaoi, i luga o leitio i le atunuu e faatatau ia Magiagi, e leai se mafuaaga talafeagai pe a tuu i le taotoga amiotonu o le mataupu e faamagalo ai fua aitalafu o latou pili eletise, i se vaega poo le aitalafu atoa.
Faaalia e se tasi o matai o le nuu ua musu e faailoa lona suafa ina nei afaina i se finagalo o matai, o le latou aiga ua leva ona mananao e faatino loa le faapipiiina o mita o le eletise e totogi muamua le cashpower, peitai ua faigata ona faatino so latou lagona ona e malosi le finau a le toatele o matai e taatia se‘i saili muamua se faaiuga i le taui o eleele o le nuu.
Na agiga i le finagalo o le Palemia talu ai nei i se faatalanoaga i se tasi o leitio tutoatasi, e to‘a limasefulu aiga o Magiagi ua malilie e faapipii loa mita o le cashpower peitai o le mafuaaga lava lea e tasi o loo tuai ai.
O le laasaga muamua ua oo nei i ai le mataupu o le agai lea o fuamita a le EPC e faitau iunite o mita tuai i fale o aiga e silia i le 300, lea o le a maua tonu ai pe tai fia ni aitalafu o loo iai a aiga taitasi.
O le a manino ai foi le mata o le vai i le aofaiga tonu o se vaega tupe o loo nofo aitalafu ai le nuu i le EPC talu mai nei tausaga e tele o mu fua.
O le galuega a le au fuamita na tautoaluaina e leoleo e silia i le to‘a selau ae na taofi ane e nisi o le nuu ae ua mae‘a ona faitau iunite o mita o fale aiga e toafā.
Na fai le feiloaiga a le komesina o leoleo ma nisi o leoleo sinia ma matai ma malilie ai matai e faaauau le galuega ae tau lava na o ni leoleo se toalima e o ma le au fuamita ae fesoasoani i ai ni matai o le komiti a le nuu, ae foi uma leoleo i le ofisa.
O le tulaga lea na oo i ai le galuega a leoleo i lea aso ma e tuuina atu lenei lipoti mo le faasalalauina e lei toe maua mai se faamatalaga lata mai pe ua mae‘a ona faitau uma iunite o mita o fale o aiga o le afioaga.
