“Ua mātele lo tatou atunuu i le faasamoaina o upu faaperetania, ae o loo iai lava upu Samoa e tatau ona faaaogā ma faasamoa ai upu faaperetania,” o le aotelega lea o se saunoaga a le Alii Palemia, Susuga Tuilaepa Lupesoliai Sailele Malielegaoi i le tulaga ua iai nei le gagana Samoa ma lona faaaogāina i aso taitasi, i faasalalauga, i tusitusiga aemaise o talanoaga.
O se itu ua iai se popolega o le taitai o le Atunuu o le a faaauau ona faaleaga ai le Gagana Samoa aemaise le taumafaiga ina ia faamalosi le Gagana Samoa i tupulaga lalovaoa o le atunuu.
O le saunoaga lea na faia e le taitai o le Malo ina ua valaaulia e saunoa i le tatalaga aloaia o le Vaiaso o Measina a Samoa na faatautaia faatasi ma le Vaiaso o le Teuila.
O Measina a Samoa na faagasolo ai faaaliga eseese o tu ma aganuu a Samoa i le Iunivesite Aoao o Samoa i Lepapaigalagala. O tomai faaleaganuu i galuega taulima, o tomai faalemafaufau i solo, tala, lauga – o ata ua faaali, o aoaoga ua faatautaia, o vaega uma ia na molimauina i lea vaiaso faapitoa ua ave ai le faatāua i soo se tu ma se aga a Samoa.
Ae e leai se isi vaega aupito sili ona tāua i le soifua o le tagata Samoa e iloa ai lona faasinomaga ma lona ituaiga tagata, nai i lo le gagana.
Ae na ta‘ua e le alii Palemia, “ua silia nei ma le 20 tausaga o talanoa ma tau fuafua auala e unai ai le aoaoina ma le faamalosi e tatau ona ave i le gagana a le atunuu ae e lei tino mai lava ia fuafuaga ae o lea e toatele le au atamamai o Samoa i le fauga o le Gagana e tatau ona faatinoa nei galuega toe faalelei,” o sana saunoaga lea.
O se tasi lava o vaega tāua na faaalia e le Alii Palemia e tatau ona taulai i ai se silasila a faiaoga o le gagana, ina ia iai ni faiga faavae poo tulafono e faamalosia ai le gagana e aoaoina i totonu o aoga, e lē gata i Samoa nei ae faapea foi i atunuu o loo aoaoina ai le gagana Samoa i fafo.
O le mafuaaga o lenei luitau a le alii Palemia, ona o lea e foliga mai ua avea nei le Gagana Samoa ma se tasi o gagana aloaia i totonu o Niu Sila ma ua ave i ai le faatāua i soo se itu o lea atunuu.
Peitai na faaalia e Tuilaepa Lupesoliai Sailele e matuā tāua atu le sao o Samoa i lenei atinae auā e tatau ona alu atu i Samoa nei le sa‘o o le gagana ma le maualuga e aoaoina ai i lea aoga ma lea aoga.
E matua tāua tele lea tulaga na ia faaalia, ma e tatau foi la ona malosi i Samoa lea tulafono poo faiga faavae a o lei aapa atu e fai se sao i le unaiga o le gagana ua iai nei i Niu Sila ma isi atunuu ua aoaoina ai lea itu o tu ma aganuu a Samoa.
O se tasi o itu na saunoa i ai le alii Palemia, o ie o le malo poo le ie Samoa. “E manaia lava le ta‘u o le ie Samoa, auā a ta‘u o le ietoga e peiseai e lē o se tatou measina ae o se ie mai Toga,” o se saunoaga lea a Tuilaepa.
Sa talanoaina i totonu o le kapeneta lea itu, ma ua manatu ai e toe lalaga le ie o le malo ma faamalosia ona o se tasi o measina tāua a le atunuu. Na faafetaia ai nisi o faalapotopotoga sa toe amataina le lalagaina o le ie Samoa, ma ua lagolago malosi le malo i le toe atinaega o lea foi measina.
E le gata i le lalagaina o le ie Samoa, ae o le gaosiga o le siapo le isi itu na toe laga e le alii Palemia. Na ia saunoa ai ole a amata unaia mai totonu o aoga, e aoaoina ai le faiga o le siapo o le a fesoasoani tele i le tomai lautele o le fanau, aemaise i latou e iai le manaoga e agai i ituaiga mataupu ua ave ai le faatāua i ia tu ma aga faa-Samoa.
