Ua faalua ona faatalatalanoa maea fusu tetele e lua i totonu o Samoa ae e tasi lava le faafitauli lea ua foliga o le a lapelapea ai taumafaiga ma sauniuniga a maea fusu nei, o le leai o se nofoaga mautu mo faipelega i le atunuu. O le faaiuga o le vaiaso faatoa maua ai se nofoaga mo fusuaga a le maea fusu a le Malisi ae ua valu lelei vaiaso talu ona amata taamilosaga mo kalapu o loo i lalo o lea maea fusu. O le faafitauli na tulai mai lava i le tausaga na tea nei ina ua lē toe tatalaina le Fale Taalo Tasi (Gym 1) ona o lea ua toe faafou uma mo le sauni atu ai o Samoa i lana taligamalo i le masina o Aukuso agai ia Setema o lenei tausaga.
O fale taalo i Tuanaimato atoa ai se fale fono tele o loo fausia i le taimi lenei, ua aloaia le avea ma nofoaga o le a usuia ai fono tetele nei mo vaiaso e lua i taimi e pei ona ta‘ua. O le mafuaaga la lena o le tapunia o ia fale taalo tetele sa faatautaia ai faipelega a maea fusu i totonu o le atunuu. O le nofoaga la lea ua avanoa ma amata ai loa taaloga poo tausinioga a le Maea Fusu a Malisi, o le fale taalo mo le taaloga o le faataavale polo ma e lē o se fale tele. O le taamilosaga a kalapu a le maea lea e ta‘ua o le Tumua ma Pule, na faatautaia foi i le nofoaga lava lea e tasi i le vaiaso foi na tea nei ma na totogi le $50 (tala Samoa) e faaaogā ai i le aso e tasi lea nofoaga ae na manino le lē saunia o lea nofoaga mo faipelega talu ai ua lē mafai ona faataatia ai se maea fusu i lea nofoaga ona e laititi tele ma na iu ina faia fusuaga i luga o le sima.
“E lē iloa poo le ā lea ituaiga malae fusu,” o se faaaliga lea a le Peresetene a le Malisi, Luafalealo Ah Tong. “E tele sauniuniga a fanau i le agai atu i taamilosaga faavaomalo ae o le faafitauli tele lava lenei ua feagai ma i matou, o le leai o se nofoaga lelei e fai ai sauniuniga a tama taaalo,” o se faaaliga lea a Luafalealo. O le tulaga foi lena na faaalia e le Maea Fusu a Tumua ma Pule lea foi ua faagasolo ana taamilosaga mo ana kalapu fusu. Ua oo lava i luga o polokalame o leitio le faaseā a sui o nei maea fusu ae na ta‘ua, ua faapea atu le Malo o le a saili se nofoaga tumau mo le taaloga ae e lei oo atu lava la se tala poo afea e tino mai ai lea talosaga.
