O le amataga o le vaiaso na tuanai atu, na faamalosia ai le tufaina o masks lea e kava ai isu, (se‘i tulou) mo tagata ma aiga uma o loo nonofo i le pitonuu o Morwell i le aai o Melepone, ona ua maitauina le toatele o fanauiti ma tuaa matutua ua faanatinati atu i fomai ma falemai ona o le faafuasei ona tau puni le mānava. Talu ai ona o le toatele o tagata ua aafia, o lea na fautuaina ai tagata uma ina ia faaaogā masks e tau fesoasoani ai mo le mānavaina o se ea mamā.
Faaalia e le ofisa o le soifua maloloina, ua maualuga le tulaga faaleagaina o le ea ona o le malosi o le pefu, le efuefu ma le asu mai afi ma mu ia o loo sasao pea talu mai le faaiuga o Ianuari.
Ma ua mautinoa le iai o faama‘i pepesi e mafua mai ona o le eleelea ma le oona o le ea lea ua silia ma le tolu vaiaso o mānavaina e tagata. Faaalia e le au tausi lafu manu, ua oo foi i nai a latou lafu manu ua afaina ma mama‘i ona o le ea mānavaina. Ua faaleo ai foi ma atugaluga a nisi o faifaatoaga laau ‘aina (fruits) ma laau faisua (vegetables) ona ua afaina a latou faatoaga, maualalo ai ma tupe maua a pisinisi.
Na ta‘ua e se tasi o tina Samoa o alala i lea pitonuu, ua tele tausaga o afaina le ea ona o le asu mai le kamupani o loo gaosia le eletise mai le malala ola, talu ai ona o le malosiaga tau eletise pito i telē lea o loo maua ai le eletise mo le aai atoa o Melepone ma le setete atoa o Vitoria. E matuā tele le asu eleelea e faaleagaina ai le ea i aso uma, ae o lea ua atili maualuga ona o afi ua faitau vaiaso o mu, lea ua oo lava ina pepesi ai ma faama‘i, e ui lava ina lipotia e le soifua maloloina e lē o ni faama‘i tumau, ae ua faaalia e fomai o Morwell le afaina tumau o le tele o fanau laiti i le ma‘i o le sela ma nisi ma‘i ogaoga.
Faaalia e le ofisa o tinei mu, masalo faatoa tau mae‘a la latou galuega o loo tau tineia ai afi nei i le isi lua vaiaso, ae o loo faaauau pea le tau sailia e le ofisa o leoleo o i latou na amata susunuina nei afi. O le Aso Tofi na amata galulue ai le malo faasetete o Vitoria ma pulenuu o Morwell ma nuu tuaoi, e tau saili ni aiga i nuu ma aai tuaoi e mafai ona ofoina atu o latou fale e mapu ane i ai tagata ua malosi le mafatia ona o le ea ua faaleagaina.
