Le Vasega 13 a le Kolisi maualuga a Lepa ma Lotofaga, ua sauni e saili avanoa i le Iunivesite aoao a Samoa i le tausaga fou mo ni tomai e aoooga ai e pei o le tomai faapitoa o le tusitala ma faasalalau

Ua savalia nei le fa vaiaso talu ona tuanai le valaauina o moliaga o se alii faipisinisi mai Saina o Jack Hao, lea ua faatali le faamasinoga i le tusi saisai ua faia ai lana poloaiga e saili mai ai lea alii.
O loo toe iloilo nei e le ofisa o le Loia sili a le Malo le mataupu e pei ona faailoa mai e le loia sili le afioga Aumua Ming Leung Wai, ina ua tuliloaina i le fia iloa poo fea o agai i ai sailiga mo le toe aumaia o Jack Hao na tuu avanoa i ai le faamasinoga e malaga e asi lona aiga i Saina, peitai e toe valaau ane ona moliaga mo le fofogaina o molimau a leoleo ile masina na tea nei, ae e lei toe foi mai i Samoa.
E lei manino mai ile finagalo o le Loia sili poo ā tonu vaega o loo silasila iai i le mataupu lenei, e pei o lana faaliga mai ise imeli o loo toe review pe toe iloilo.
O le alii faipisinisi mai Saina sa faagaioia ni ana pisinisi i Samoa o se faleoloa. O le tamaitai na tagi i leoleo faasaga i le alii o Jack Hao, o se tasi sa faafaigaluega i le pisinisi a lea alii. O le maea o suesuega a leoleo na faia ai loa moliaga o le faaoolima matagā ma le faiaiga fai faamalosi faasaga i lea faipisinisi mai Saina.
O le solitulafono e pei ona faaalia i moliaga a leoleo na tupu ise tasi o fale sa faamautu ai Jack lea sa faigaluega ai le tamaitai mai se afioaga i le lotoifale o le taulaga, ma e faapea mai se molimau e lei leva ona faafaigaluega le tamaitai e le alii faipisinisi ae tupu loa ma le solitulafono.
E le o mautinoa pe iai se feagaiga a Samoa ma le atunuu o Saina e mafai ai ona aumai faapagota ni tagata o lea atunuu poo nisi ua avea ma sitiseni o Saina e tali i ni tuuaiga e molia ai i Samoa.
O Amerika Samoa lea sa tulai mai ai talu ai i se taimi o le tausaga nei se faamasinoga o se alii faipisinisi mai Asia sa ia faafaigaluega ni tamaitai mai Samoa tutoatasi. O moliaga o le faaaoga o ia tamaitai i ni auala faapisinisi solitulafono e ala i ni faiga faatalitane.
O nisi foi mataupu lava faapenei i ni tausaga ua mavae sa aafia ai nisi o alo tamaitai mai Samoa tutoatasi sa faafaigaluega foi i ni pisinisi a tagata mai Asia i totonu o Tutuila, ma o nisi o ia mataupu ua maea suesueina e le faamasinoga a le teritori ma ua faasala ai i le falepuipui le au faipisinisi na faafaigaluegaina ia tamaitai mai lo tatou atunuu.
O nisi ia o vaega ua faaalia e se faalapotopotoga tumaoti i Samoa o loo mataituina sauaga e aafia ai tamaitai ma faiga solitulafono tau feusuaiga fai faamalosi, e ao i le Malo ona matua sailiili lelei i latou o le au faipisinisi mai fafo, ina ia lē mafai ona latou faia ni tulaga faapea i tamaitai o le atunuu latou te faafaigaluegaina.