O se tamā Samoa, o Alavine Feliuia Liu, ua lē talia ona toe foi mai i Niu Sila ina ia mafuta faatasi ma lona aiga. O le aso 18 o Aperila i le tausaga e 2012 na tipoti ai pe toe faafoi faamalosi i Samoa lenei tamā ina ua magalo mai i tua ma le falepuipui o alii i Kalaiesetete. O moliaga o le faasauā o lenei tamā i lona toalua na mafua ai ona falepuipui ma aveesea mai, e ui sa finau mo sona avanoa e toe fia mafuta i lona aiga, ona e mafana tele lenei tamā i lana fanau.
O loo ta‘ua i se lipoti a le Fairfax NZ News, le faatonuina e le Faamasinoga Maualuga se tasi mai le ofisa o femalagaaiga a Niu Sila, ina ia toe iloilo le latou faaiuga lea na toe tipoti ai Liu i Samoa, pe a fua i vaega e 9 ma le vaega 10 o le Fono a Malo Aufaatasi lea e faatāua ai le aiā tatau a le tamaitiiti (United Nations Convention of the Rights of the Child). I le vaega 9 o lena tulafono o loo ta‘ua ai, e lē tatau ona tuueseeseina faamalosi se tamaitiiti mai ona mātua se‘i vaganā pe afai o se faaiuga sili ona lelei lea mo le puipuiga o lea tamaitiiti. O le vaega 10 o loo faatāua ai le toe faatasia o se aiga ma le aiā tatau a le tamaitiiti e maua ai ana fesootaiga faifai pea ma ona mātua o loo nonofo i nisi atunuu.
O lenei finauga na lagolagoina e le Matagaluega o Pisinisi, Polokalame Fou ma Galuega (Ministry of Business, Innovation and Employment) i le Faamasinoga o Talosaga Apili. Peitai i le faaiuga na tuuina mai e le Faamasinoga o Talosaga Apili i le aso 26 o Fepuari 2014, lea ua faalēaogāina ai le poloaiga a le Faamasinoga Maualuga na tuuina atu i le sui o le ofisa o femalagaaiga a Niu Sila, ina ia toe iloilo le faaiuga na tipoti ai Liu i Samoa. Ta‘ua i lea lipoti a le Fairfax NZ News, o le tausaga e 2006 na malaga mai ai Liu i Niu Sila i se pemita asiasi, ae mulimuli mai lona toalua ma le la fanau e toalua. Na toe fanau le isi la tama i Niu Sila.
Peitai o le tausaga e 2008 na avatu ai e le faamasinoga se poloaiga e faasā ai ona toe fesootai atu lenei tamā i lona toalua ona ta‘ua e le fafine, e sauā tele le tamaloa ia te ia i le tele o taimi.
Na iu ina toe foi le fafine ma lana fanau i Samoa, ma i lena taimi ua fai le isi toalua o Liu, ma o le toalua lea o se fafine ua sitiseni i Niu Sila, e iai foi sana tama mai se isi ana mafutaga muamua. Na maua le la tama faatasi ma Liu i le tausaga e 2009. Sa talosaga i le vaega o femalagaaiga ma maua ane ai ni pemita faigaluega sa mafai ai ona nofo pea Liu i Niu Sila ma faigaluega ma faatasi ai pea ma lona aiga fou lea ua iai. Ma i faamaumauga sa faamaonia ai, e mafana tele ma lelei le tamaloa o Liu i lana fanau lea ua iai, peitai e tele taimi sa toe foi ai lava Liu i lana masaniga o le fasi o lona toalua.
Na toe tuu i ai se isi poloaiga e faasā ai ona toe fesootai i le fafine ma lana fanau, peitai e na te lei usitaia, ma faasala ai loa faafalepuipui mo le ono masina, ma faia nisi o galuega lē totogia mo le komiuniti. O le aso 17 o Iulai i le 2011 lea na uma ai le aogā o lona pemita faigaluega mulimuli na iai. Sa tetee le fafine i le faaiuga a le ofisa e toe faafoi ai Liu i Samoa, i le mafuaaga e pei ona ia finauina, ona o lana fanau e tatau ona iai lo la tamā. Sa finau le fafine o le a ia toe taumafai e sosoo le la aiga ma Liu pe afai e faia ni togafitiga e fesoasoani ai ia Liu e taofi le masaniga leaga e pei ona pulea e le ‘ava malosi.
E tusa ai ma le vaega 9 o le tulafono, na ta‘ua e faamasino o le Faamasinoga o Talosaga Apili, pe a iloiloina le tulaga sologa lelei o tagata lautele, e ono talafeagai ai le aveesea faamalosi o se tasi o matua, e tusa lava pe o le a valavala ai ma sona alo. I nisi vaega o lena faaiuga na ta‘ua ai, ‘i tulaga faapena e faatalitalia le faatāua o manaoga o le tamaitiiti, peitai e lē faapea o le a matuā faamuamua uma i ai le iloiloga. Na ta‘ua e faamasino e lē faaaogāina le vaega 10 o le tulafono i lenei mataupu. Na ta‘ua i le faaiuga, e lei sese le ofisa a le femalagaaiga e tusa ai ma le tulafono, i lo latou lē toe iloiloina o vaega o le tulafono, aemaise foi o le lē toe iloiloina o le poloaiga lea na toe ave faamalosi ai le tamā o Liu i Samoa.
