Faasala le alii leoleo o Maanaima Patu i le liki i tua o faamatalaga

O le faamasinoina o le alii leoleo o le vaega o taavale afi i le matagaluega o leoleo ma falepupui le susuga Maanaima Patu, e le Police Tribunal poo le faamasinoga faaleoleo ua faamaonia ai lona aafia i le mama i tua poo le liki o le lipoti o suesuega a leoleo i le mataupu ua molia ai nei le Sui palemia le tofa Fonotoe Nuafesili Pierre Lauofo ma le Minisita lagolago le afioga Muagututagata Peter Ah Him. O le lipoti lea na faasalalau e se nusipepa ma se tasi o upega tafa’ilagi lea na aliali ai faamatalaga uma o le mea na tupu ina ua taofi e leoleo le taavale a le minisita lagolago ae oo atu ai ma le taavale a le Sui palemia. O lea tiute o leoleo na faia i le masina o Oketopa o le tausaga ua mavae e mafua ina ua liliu sese le taavale a le minisita lagolago i se tasi o magaala o le taulaga o Apia. Le magaala lea o loo i luma ane o le maota fou o le NPF e faafesagai ma le nofoaga sa iai le faleoloa o Faatoaga.

 
O le vaiaso na tea nei na suesueina ai le alii leoleo e le famasinoga faaleoleo i le moliaga o le solia o taiala o ona tiute faaleoleo ina ua liki le lipoti i le aufaasalalau. O le faamaonia o le moliaga ua faasala ai Maanaima i le sala tupe e $50 tala e togitogi tai lima tala i le lua vaiaso. E aveesea lea sala mai lona totogi masani lea e maua i totonu o le lua vaiaso (fortnight salary payment).
E lē gata ina faia lea faaiuga ae ua tuu atu ma le lapataiga malosi i le alii leoleo ina ia aua lava ne‘i toe tulai mai lea tulaga i le faatinoga o ona tiute. Ua faaalia e le sui Komesina le sooupu o le Matagaluega o leoleo ma falepuipui, le tofa Fauono Talalelei Tapu lona talia o le faaiuga ua taunuu i ai suesuega sa faia e leoleo i le liki o le lipoti pe na faapefea ona oo i le aufaasalalau le media.

 
O se tamaitai tusitala o se tasi o itutino o faasalalauga sa ave i ai se tusi mai leoleo sa faia le suesuega ina ia oo atu e faia sana faamatalaga i le liki i tua o le lipoti a leoleo. Peitai e lei taliaina e le pulega o le itutino o faasalalauga le talosaga a leoleo ona o le puipui ia i latou e maua ai faamatalaga auā o se tasi o taiala tāua i le faatinoga o le latou galuega. O taiala foi o le lipotia o tala o loo faamamafa ai le malupuipuia o faamatalaga e maua mai nisi, ma ia lē faailoaina. Se‘i vaganā se finagalo mai le faamasinoga e poloaiina ai se tusitala o se nusipepa, se televise poo se leitio e faailoa lē na maua ai se faamatalaga ona faato‘ā iai lea o se fuafuaga e faatino lea tulaga.

 
Peitai o le pitolaau faatusitala i le lipotia o mea e tutupu e fulisia lava e taofiofi le faailoaina o tagata e maua ai ni faamatalaga ona o le puipuigamalu o i latou tusa lava pe iai se faatonuga poo se poloaiga mai le faamasinoga.  Ua loto malie foi se tusitala e faasala i le falepuipui pe a lē usitaia se finagalo faapea o le faamasinoga, ona o le puipuia lava o i latou e maua ai faamatalaga.

Susuga i le alii leoleo satini o Evile ma le susuga Maanaima Patu i le itu taumatau, lea ua faasala tupe e le faamasinoga faaleoleo poo le Police Tribunal e mafua i le lipoti a leoleo i le mataupu i le Sui palemia ma se tasi o minisita lagolago na liki ma faasalalau e se nusipepa