Ua faaauau galuega suesue ma osofaiga a le Matagaluega o Leoleo i aiga ma i latou ua maua ni ripoti o loo totoina ma umia pe faatau atu foi fualaau faasāina.
O le osofaiga lea mulimuli na faia i se maota o se aiga i Tiavi ae na maua ai laau maruana lea o loo tālia se faamaoniga a le ofisa pe fia. E toalua ni alii na saisai mai ai e leoleo ma e oo mai i le taimi lenei o loo taofia.
O lea ua fā vaiaso sosoo ae ua fā foi osofaiga ua faia e le Ofisa o Leoleo i lipoti ua oo atu ia i latou e faatatau i nisi ua masalomia le faia o nei faiga faasolitulafono.
O le aiga muamua o Afiamalu lea ua faatali ai le molia o nisi se toatolu, o tupe, o meafaitino e masalomia le gaosia ai o le fualaau faasāina o le aisa ma ni aupega.
O le sailiga lona lua lea na faia i le afioaga o Faleatiu e silia i le 500 laau tetele lava ia o le maruana, o fatu, o lala ma aupega foi. E toalima i latou na taofia mai i lea osofaiga ma o loo tālia foi le tali e avatu i le faamasinoga ona o nei tuua‘iga.
O le osofaiga na sosoo ai na taofia ai foi nisi mai i le afioaga o Ululoloa. O le sailiga la lea na maua ai meafaigaluega auā le gaosiga o le aisa ma isi foi maruana.
E toafā i latou na taofia mai e leoleo i lea suesuega ma e iai le masalosaloga e fesootai i latou mai lea nofoaga ma Afiamalu lea na muai osofaia i le masina ua tea.
O Tiavi la lea ua sau ai le isi osofaiga ma e pei ona ta‘ua e le sui sooupu o le Matagaluega ia Su‘a Muliaga Tiumalu, e tele lava foi isi galuega ua fuafua i ai le Matagaluega ma ua galulue ai ma le mamalu o le atunuu ua fesootai atu mo lea faamoemoe.
O le tautinoga lava lea a le Komesina fou o Leoleo ia Egon Keil i lona tulai mai i le tofi o le taitaiga lea o le Ofisa o Leoleo, ina ia mautinoa e tafiesea nei uiga solitulafono talu ai le taatele tele o le faafitauli o maruana ua vaaia i Samoa.
O le vaiaso lenei ua agai leoleo i puipuiga o nofoaga o loo faatautaia ai le taligamalo ma Taaloga a Tupulaga o Malo o le Taupulega, ma ua iai le faamoemoe o le matagaluega, o le mae‘a o nei galuega o le a faaauau ai isi suesuega o loo faataatia ese i le taimi nei.
