Christina Taefu Miss Samoa NZ 2015 – 2016
Ua auai atu nei i Samoa le tamaitai lalelei o Christina Taefu lea na faapaleina o le Tausala poo le Miss Samoa New Zealand 2015 – 2016, e finauina le pale o le Miss Samoa, ma pe afai na te manumaloina, ona avea ai lea o ia ma Tausala o Samoa aoao e tauva mo le pale o le Tausala o Atumotu o le Pasefika, poo le Miss Pacific Islands, o le pale lena o loo tauaveina i le taimi nei e le Miss Samoa, le tamaitai o Latafale Auvaa.
I se pepa o faamatalaga na tuuina mai o loo ta‘ua ai, e toavalu tamaitai i totonu lava o Niu Sila na faaofi atu o latou suafa e tauva mo le sailia o se Miss Samoa NZ, lea sa faatautaia lava i luga o fesootaiga faainitaneti e pei ona amata mai le tausaga talu ai.
Mai lena toavalu na filifili mai ai le toatolu o tamaitai talavou e faia i ai le faaiuga faaiu a le laulau o faamasino, e fua i aiaiga ma taiala sa muai folasia atu e faatino mai i ai a latou tapenapenaga o se tamaitai tauva. Ma o lenei laulau o faamasino, sa faia uma a‘e i nisi o tamaitai sa manulalo foi i tausaga ua tuanai i le pale o le Miss Samoa NZ.
O le 24 ai lenei o tausaga talu ona faavae mai lenei tauvaga o le Miss Samoa New Zealand, ae o le lona lua lenei o tausaga talu ona suia le faatinoga o le filifilia o se tasi na te tauaveina le pale, o le faia lea i luga o fesootaiga faainitaneti(online).
O lea na tasi ai le filifiliga a faamasino, i le tamaitai o Christina Taefu, ua 25 tausaga o lona matua, mai le pitonuu o Manurewa i Aukilani. O se tamaitai o loo aoga i mataupu tau faufautua (Counselling Student) ae galue foi i tomai faataufale (Real Estate agent). O ona afioaga i Samoa o Siufaga i Falelatai i le motu o Upolu.
Ta‘ua i le pepa o faamatalaga lagona faaleo o le tamaitai o Christina e faapea, “I le avea o a‘u ma Miss Samoa NZ 2015, ua taulai atu ai o‘u faanaunauga ina ia ia ou saosaolaumea mo se lelei o la‘u aganuu, i le avea ai o a‘u ma leo mo tamaitai talavou uma o Samoa. Ou te fia faailoa atu i tagata uma o lo‘u atunuu, e leai se mea e faigata, ma e tatau ona tatou mitamita i o tatou faasinomaga ma mea o loo mafai ona tatou ausia.”
O le vaiaso lenei o loo faagasolo ai i Samoa aso faamanatu o le Teuila, lea e taualuga foi i le tauvaga o le sailia o se Tausala o Samoa, le Miss Samoa 2015 – 2016, e faia i le afiafi o le Aso Toonai, 12 Setema i le Gym #1 i Tuanaimato.
E toalima isi tamaitai talavou o le a tauva faatasi ma Christina Taefu le Miss Samoa Niu Sila. O i latou ia o Grace Aloese (Miss Apaula Heights), Laura Maiai (Miss Ferri Styla), Iliganoa Atoa (Miss Filipinsew), Shauna Tagaloa (Miss Le Manumea Hotel), ma le tamaitai o Ariana Taufao (Miss Samoa Australia).
E $30 tala le tau o le pepa ulufale i lenei tauvaga, ma o le Miss Samoa i le taimi nei, Latafale Auvaa, o ia lena e faapaleina le tamaitai o le a manumalo mai lea tauvaga i le Aso Toonai nei.
Talosia le alo atu o le Miss Samoa NZ, Christina Taefu mo le tauvaina o le pale o le Miss Samoa, faapea foi tamaitai uma o le a tausinio i lea afiafi. O tou māmā na!
