E 10 miliona lima selau limasefulu afe tala o loo faaaluina i le tausaga e le Malo e ave ai gasegase mai Samoa mo togafitiga i fafo lea o loo tele ina ave i Niu Sila. O le itu mautinoa e lē o se tupe laitiiti auā e tetele foi vaegatupe o loo faasafua pea e le Malo mo le faagaioia o le Matagaluega o le soifua maloloina i tausaga uma i le manulauti lava e tasi o le togafitia o le mamalu o le atunuu mai aafiaga i gasegase eseese ua maua ai.
O le tatalaina o le vaega muamua o le falemai fou o Tupua Tamasese Meaole i Motootua ua iai ma se isi laasaga fou i taumafaiga a le Malo e ave le faamuamua i le soifua maloloina lelei o tagata uma o le atunuu, e pei ona saunoa le taitai o le Malo le afioga i le Palemia, o le a togafitia ai ma gasegase sa masani ona ave i fafo mo togafitiga.
Ua fuafuaina e le Malo o le a faatotoga le falemai i masini faaonapo nei e mafai ai ona ausia lea tulaga. Saunoa le Palemia i ni polokalame ma fale televise ma leitio i le atunuu i le vaiaso ua mavae, o le a iai suiga mai fafo i le falemai fou e pei o le faaaogā o fesootaiga faaonapo nei e mafai ai e se fomai i fafo ona faatonutonu mai le faiga o se taotoga.
O se isi lea auala lelei e lē toe avea ai i fafo se gasegase sa lei mafai ona togafitia muamua i Samoa. O se isi auala o le mafai lea ona malaga mai ni fomai mai fafo e faia ni togafitiga i Samoa.
O se taumafaiga muamua lava a le malo i se auala faapea na malaga mai ai fomai faapitoa mai Niu Sila e faia taotoga o le gasegase o le fatu, lea na faatino i le maota gasegase o Tupua Tamasese Meaole i nai tausaga e lei mamao tele atu.
O se gaioiga na maua ai le faamāmā avega mo le toatele o aiga sa aafia o latou tagata i auga o le gasegase o le fatu auā sa faasaoina ai le taimi e tau malaga ai i Niu Sila mo taotoga, ae sa faaitiitia ai foi ma tupe faaalu a le Malo mo ia togafitiga.
O le vaega e faia ai taotoga poo le fale tipitipi ua silia ma le lua potu faapitoa faapea mo ia togafitiga ma o se isi lea tulaga lelei i le fuafuaga a le malo e faia lava i Samoa taotoga sa lē mafai ona faatino i tausaga ua mavae.
E lē fesiligia o se tulaga lelei lea mo le atunuu atoa auā o le a lē tau saili fesoasoani i le itu tau tupe mo le aveina i fafo o ni gasegase faigata sa lē mafai ona togafitia i Samoa. O le siitia maualuga o le tulaga o le tautua faalesoifua maloloina i Samoa i ia suiga fou na saunoa le Palemia o le a avea ai le falemai fou ua tatalaina ma isi vaega o loo fausia ma nofoaga tutotonu mo le togafitia o soo se gasegase. O le a mafai ai e atunuu tuaoi e pei o Amerika Samoa ona aumai i ai ni gasegase e togafitia ai auā o le a sili ona latalata ma taugofie mo latou.
