Lafo text o upu masoā ma ata o feusuaiga i le telefoni feaveai

O lona leo e tau lē lagona ma ona mata e fealofa‘i solo pe a ea i luga ma vaai atu i le faamasino, o vaaiga ia i le alii o Lago‘ele Teleiai Moga, faatoa 18 tausaga o lona matua, a o tulai i le potu faamasino numera 4 o le faamasinoga faaitumalo i Mulinuu mo se faaiuga a le faamasinoga.
Sa molia lea taulealea talavou mai le nuu o Samatau i moliaga o lona faia o ni fesootaiga solitulafono ma se isi tagata ina ua ia lafo i se tina o Tuanaimato o Mandy Keil, ni feau faalumaluma ma ni ata matagā.
O se tasi lenei o solitulafono e fou i le atunuu ina ua faaaogāina fesootaiga televavave faaonapo nei i telefoni feaveai ma initaneti. O le alii o Lago‘ele e pei ona ta‘ua e leoleo sa ia lafo se feau tusitusia poo se txt i lana uo teine sa ia talosagaina ai se tupe e fafaga ai le palei o lana telefoni.
Peitai na sese lana feau tusitusia i le telefoni a le tina o Mandy Keil o Tuanaimato. E faalua ona lafo lea text ma iu loa ina telefoni i ai le tina i le alii ma ta‘u i ai e aua ne‘i toe lafoina atu se text e sese le numera lea e avatu i ai.
Na faaalia e leoleo e lei tuua ai le gaioiga a le alii o Lago‘ele ae ua ia faaauau pea ona lafo feau tusitusia i le telefoni a lea tina. E lima ni text e faapea na lafo ai ni upu faalumaluma ma le masoā, sosoo ai ma ni text se lua o ni ata matagā.
Fai mai leoleo o le isi text o le ata o le itutino sa o se alii, ma le ata o se alii ma se tamaitai o loo faia se feusuaiga faaulugalii. Na oso a‘e le lē fiafia o le tina o Mandy ma ia vili loa leoleo mo se fesoasoani ma faaulu ai loa ma lana tagi.
Fai mai na faatino le suesuega ma maua ai loa le tagata e ana le numera o le telefoni na lafo atu ai text. Peitai na faaalia e lea tagata o lana numera lea ua leva e lē o toe ia te ia. Na faaauau pea sailiiliga seia oo ina maua le alii o Lago‘ele lea na fesiligia ai e leoleo lona tina ma faamaonia ai o le numera lea o le telefoni feaveai o loo latou faaaogāina. Na ioe le taulealea o ia na faia le gaioiga ma faapea lona ona molia e leoleo.
Ina ua tulai o ia mo se faaiuga sa ia faaalia ua uma ona faia se faatoesega i le tina na aafia i lana solitulafono ma ua talia. O se ‘ai lelei lea mo ia i le silasila a le faamasinoga. O le fautuaga a le afioga i le faamasino o Vaepule Vaemoa Vaai, ia aua nei taalo i lagona o isi tagata ona e lē o  se mea lelei.
O lana solitulafono e fai si matuia ae ua manatu le faamasinoga o le faasala tupe e lua selau tala ma ia aua ne‘i toe molia atu i le faia o lea ituaiga o solitulafono i le lumanai.