Lē mautonu Jonathan i le mafuaaga na ioe ai i leoleo

O le faamatalaga a le alii o Jonathan Patrick Crichton o Malifa i leoleo ina ua suesueina i le maliu o le alii Niu Sila o Hans Dalton i le aso 26 o Tesema o le tausaga e 2012, i le falepuipui i Tafaigata o ia na faia le faalavelave na ia faaoolima ai i lē ua maliu ma lelemo i le kalone vai (silasila i le ata).
Peitai o le teena e le alii o le moliaga o le fasioti tagata faamoemoeina na ia faamatala ai i lana molimau i le faamasinoga, sa tu‘ifesili o ia e le alii leoleo asiasi na faia le faatalanoaga o ia, ma fai atu nisi o faamatalaga na mafua ai ona lē mautonu lona mafaufau ma ia ioe loa i le mafuaaga na maliu ai Hans Dalton.
“Sa fai mai o lea o loo faatali le isi o‘u faamasinoga i le isi foi solitulafono ae o lea foi ua ou toe faia le solitulafono lava lea e tasi ma ou te fiu lava, e iai le aso ou te ma‘i ai ma iloa ai le mea moni”.
O se vaega lea o le molimau tuu fofoga a le alii o Jonathan a o fesiligia e lana loia le tamaitai o Rosella Papalii. Na ia faaalia foi ua pressure tele lona mafaufau na ia fai ai i leoleo sa ia faaaogā se ki o le apa maligi (o se meaai tuuapa) e tatala ai le faitotoa o le sela sa loka ai Hans ma ia faia loa i ai le gaioiga na maliu ai.
Sa fesili lana loia pe aisea na ia faia ai lea faamatalaga i leoleo ma ta‘ua ai le apa maligi. Na tali le alii e iai apa maligi i lona potu ma na tau i ai lona mafaufau ina ua fesiligia e le leoleo a o suesueia o ia i le ofisa autu i Apia i le aso 8 o Ianuari o le tausaga e 2013.
O le aso tonu lea na aumai ai le alii o Jonathan ma le isi pagota o Siliva sa loka faatasi i le potu e tasi e sosoo ma le potu poo le sela numela 4 sa loka ai Hans Dalton. Na faamatala le alii o le aso tonu foi lea sa faatulaga e alu ai e vaai le fomai i le falemai ona sa ma‘i ma sa leai sona manatu e suesueina o ia e leoleo i le faalavelave.
Na ia ta‘ua foi i lana molimau e leai ma se isi o leoleo poo se isi foi i le falepuipui na fai atu ia te ia i le aso lea a o lei aumaia i le ofisa o leoleo i Apia, o ia lea o loo masalomia i le faalavelave.
O loo finau le tamaitai loia mo Jonathan e leai se molimau e tasi a leoleo mai molimau ua mae‘a tuuina atu o faamaonia ai sa faatino e Jonathan le faalavelave.
O le mātau foi lea i le tina o lē ua maliu o se taamaitai papalagi mai Niu Sila, ona o taimi uma sa molimau ai le alii leoleo asiasi o Samuelu Afamasaga sa suesueina lē o loo molia, e na o le lūlū o le ao o le tina i lona lē talitonuina o faamatalaga o le molimau a le alii leoleo na faia suesuega.
O le molimau atu foi a o faagasolo le molimau a le alii leoleo asiasi e talanoa le tina o lē ua maliu i le alii o Jonathan auā e sosoo lava o la nofoa.
E tasi lava le tali a le alii leoleo na faia le suesuega o mea na ia vaaia i le falepuipui i le vaega tonu na tupu ai le faalavelave ma faamatalaga na tuuina atu e lē ua molia ua faavae ai lana suesuega, ae e lē o natia e leoleo se isi lava mau pe faaufiufi foi se isi mea ina ne‘i iloa ai e lē o Jonathan na faia le faalavelave ae o se isi tagata poo nisi foi.
O le molimau a lē ua molia na ia ta‘ua ai, o le aso 25 o Tesema 2012 ina ua loka atu Hans, sa faufau e‘e le alii ma palauvale ma tatu‘i solo le puipui o le sela sa loka ai. O le aso na sosoo ai o le mea foi lea na fai, ma o le aso 26 lea o Tesema. O se tasi o taimi e pei ona faamatala le alii, sa valaau atu ai Hans ia te ia e avatu le afi se‘i tutu ai lana tulinamu ma sa alu ave i ai, peitai na te‘i ina ua mau le alii ua maliu i lona lima ma taumafai e toso atu ia.
Na ia tago ua uu le ua o lē ua maliu ma taumafai e aveese mai ona lima seia oo ina mafai ona mamulu ona lima. O le po o le aso lea sa fai foi le sauniga a lē ua maliu o le e‘e ma palauvale ma tatu‘i le puipui o le sela sa loka ai ma tau valaau i le igoa o lona toalua.
Poo le tea o le iva i le po lea na mafai ai ona maua se moe a Jonathan, ae ina ua ala a‘e i le taeao o le aso na sosoo ai na agai loa i le potu sa iai Hans e vaai poo moe ona ua lē toe pisa. Peitai na faamatala le alii ua molia na te‘i ina ua vaai atu o loo taatia mai i totonu o le kalone vai o loo u i luga ona vae.
Sa lē talitonu ma toe taumafai e pupula lelei ona mata pe moni le vaaiga na ia vaaia. Ma sa faamaonia lava ua maliu le alii. Na e‘e ma tauvalaau i leoleo mo se fesoasoani, lea na faavave atu ai nisi o leoleo ma latou aveese mai le tino o Hans mai totonu o le kalone.
E toaono i latou na siieseina lē ua maliu. O le vaiaso nei e faia ai folasaga faaiu a loia ma le folasaga a le alii faamasino le Afioga Lesatele Rapi Vaai, ona taatia atu lea o se faaiuga i le iloiloga a se laulau o faatonu poo assesors e toafā. E toalua tamaitai ma alii e toalua.
O Jonathan o loo tuli lona faasalaga soloatoa ina ua faamaonia lona moliaga o le fasioti tagata faamoemoeina ina ua ia faaoo le maliu i se alii avetaxi i le nofoaga e faatau ai le cashpower i Vaitele.
E taofia o ia i le falepuipui mo lea solitulafono ae taofia atu ai ma Hans Dalton lea ua toe molia ai i le maliu o lea alii mai Niu Sila e faaletonu lona mafaufau.