Mo tatou tagata ia na vili mai e fia manino poo le ā tonu le iuga o le faamasinoga a le Siva Afi ma le malo o Samoa, ou te faapea atu ua malo Siva Afi ua toe sii i luga e le fale faamasino ia le tupe e totogi e le malo ia Siva Afi.
O le faaiuga a le Supreme Court, a tuufaatasi le tupe vaega eseese lea ua fai mai le Supreme Court e maua e Siva Afi, ua faaluaina le tupe na aumai muamua e le malo o Samoa i lenei kamupani.
O le tupe na totogi e le malo ia Siva Afi, ina ua aveese faamalosi e le malo o Samoa le eleele na lisi e Siva Afi mai le malo, i Apia.
E na o le 3 tausaga o le lisi e 20 tausaga, ma toe faaopoopo ma le isi 20 tausaga, ae faatonuloa e le malo o Samoa Siva Afi e o ese ona ua manaomia e le malo le fanua lea na lisi e Siva Afi e fai ai ni fale tetele o le malo.
E ui ina lei taliaina uma e le Supreme Court vaega eseese tau tupe sa talosaga i ai Siva Afi i le faaluaina o le tupe lea ua maua i le faaiuga a le Supreme Court, i lo le tupe na totogi e le malo o Samoa ia Siva Afi.
O le faaiuga sa lauina e le faamasino, ona e lei uma ona tapena se faaiuga tusitusia a le Supreme Court. E oo mai i le taimi na tusia ai le article lenei, e lei mauaina mai le faaiuga tusitusia (written decision).
Atonu ua toeitiiti maua mai le faaiuga tusitusia, auā saunoa le faamasino e maua le faaiuga tusitusia i le vaiaso poo le lua foi o vaiaso.
E le lautele se talanoaina o le faaiuga ona o lea e lei maua mai le faaiuga tusitusia.
O le tāua mo i tatou o ni a‘oa‘oga e maua mai i lea mataupu mo le tatou silafia lautele:
1. Sa saunoa le alo o Samoa o Lene Leota ma lona faletua o Clare e la te talisapaia fesuiaiga, o le lisi pe afaia e manuia lautele ai Samoa, ae o le auala na faaaogā e le malo e faamalosi le aveeseina o le latou kamupani ma le eleele, o auala solitulafono.
2. Poo le malo o Samoa poo ai lava le tagata maualuga lona tulaga, e tasi le tulafono o le malo o Samoa, e tatau ona faaaogā ma usitaia e tagata uma, e aafia ai ma le Malo o Samoa.
3. O le tulafono a Samoa ma Niu Sila, poo le ā le maulalo poo le mativa o le tagata, e puipui i le tulafono aiā tatau a tagata uma. O le mea e faanoanoa ai o se faaupuga a se faipule o le malo o Samoa na fai ia Lene Leota ina ua ofo i ai e le malo le tino i tupe laitiiti lea ua faaopoopoina ma faaluaina e le Supreme Court, sa faapea: “Lene, this is a lot of money for a boy from Savaii” E foliga mai iina le vaai maulalo o le isi Samoa i le isi Samoa.
4. Ia nofouta i mea tau lisi o eleele, ia faitau lelei ia upu ninii i luga o pepa lei sainia. Meamanu le mataala o Lene Leota ma lona faletua i le faitauina o le tusitusiga ninii i le lisi na la sainia ma le malo, semanu e faapenei e leai se la tupe e maua, ae ua alu le tele o tupe le kamupani a lenei ulugalii e fausia ai fale mautu auā le faaaluga o le latou pisinisi mo tausaga e 20 o le lisi. Pagā lea, e uma na fau fale ae faamalosia le aveeseina o lenei kamupani e le malo ona ua fia faaaogā e le malo le eleele.
5. Sa muamua ave e le malo ia Siva Afi company, i le Supreme Court ona ua fai mai e lei totogiina le latou rent. Ona sa ou mauaina e lē sa‘o lea tuua‘iga mai i pepa tusitusia ma sainia e le malo ma Siva Afi, sa ou tetee i lea tuuaiga i le fale faamasino, ma sa malo Siva Afi.
6. Na iu lava ina pasia e le malo le tulafono Taking of Land Act, e aafia ai ma eleele lisi ina ia aveese faamalosi mai ai Siva Afi mai i le eleele sa latou lisiina. E iai le power o le malo e pasia ai tulafono. Ae faanoanoa o auala na faaaogāina e pei Samoa o se atunuu lē kerisiano.
7. Sa ofa mai e le Palemia o Samoa ia Siva Afi ma le loia a Siva Afi le eleele o le malo i tua o le Government House e siii ai Siva Afi ma le latou pisinisi, ae peitai, ua toe sui le mafaufau o o le malo, ma toe aveese lea ofa.
Pe mata e soonafai faapea e le malo o Samoa le au faipisinisi tetele ma milionea o i Samoa?
Faafetai i le tulafono ona e maua ai se toomaga mo tagata vaivai.
E tusa pe laitiiti pe tele tupe e maua, ae ua maua se auala e sulu i ai, mo mea e lē sa‘o sa‘o ona fai e isi tagata ola, i isi tagata ola.
