Ina ua finagalo le Atua e fau se vaa e faasaoina ai Noa ma lona aiga, sa aumai ia Noa faatonuga i le fausiaina ma mea uma e faaaogā mo le faasaoina o latou.
O le fua o le umi, loloto ma lona lautele, e oo lava i laau e faaaogā, ae tainane le faaauvaaina mo le folauga. Ina ua totō timuga ma siisii le vai, ua opeopea le vaa ma ua tafea i peau malolosi ma lologa, seia oo ina tuta manuia ma saogalemu pei o le folafolaga a le Atua.
O le Titanic, o le vaa sa fau e le poto ma le mafaufau o le tagata. O mea uma sa lelei ma le tomai ua atoatoa i le faatinoina o lea faamoemoe.
O le talitonuga o le kapeteni ma inisinia sa fauina le vaa, e leai se mea e mafai ona faaleagaina ma ono goto ai lenei vaa taugata ma le logologoa.
Ae talofa, e lei tuta pei ona manatu le kapeteni ma le auvaa. E silia ma le tasi afe soifua sa maliliu ma faalumaina ai le poto o le tagata – ua goto le Titanic.
E lei goto le vaa o Noa auā sa matai tufuga le Atua, ae goto le Titanic sa faamoemoe i le poto o le tagata
Sa manaia le mamanuina ma le teuteuina o faamalama tioata ma le taugata o le Titanic. Sa fai faatatau mo le matamataga a le tagata, ma faaalia ai atamai ma tomai. Sa nenee ma faaviivii tagata i le manaia i le vaai, ae talofa na nutililiiina ma taei ina ua fetoai ma le malosi o le natura o mea na faia e le Atua.
O le vaa o Noa, sa faatonuina e tasi lona faamalama e faasaga i le lagi, o le faailoga o le finagalo o le Matai, ina ia faasagasaga atu manatu ma le faamoemoe o le tagata ia te ia.
O le faamalama e tasi e tatala mo talosaga, ma ia faamuamua e Noa ma lona auaiga le Atua, ma ia na o ia lava.
Le faamalama lea sa silasila mai ai le Atua, ae nutipala faamalama o le Titanic auā o faamalama mo le faamalieina o mata, ma le faalialiavale ona o le poto ma le atamai o le tagata.
Sa tele faitotoa mananaia o le Titanic, o faitotoa sa fausia i uamea malolosi. Sa faavasega faitotoa taitasi ma lona tāua. O le faitotoa mo le au maumea ma tagata faipisinisi.
O isi faitotoa mo pasese taualoa ma le tāua, iai foi faitotoa mo le aufaigaluega ma latou e vaivai le tamaoaiga, sa totogi pasese taugofie.
O le vaa o Noa, e tasi lona faitotoa. Poo le ā le fia maualuga o le manu, e toele uma ina ia ui i le faitotoa ua saunia e le Atua. Pe lapoa lava le elefane, e ui ai lava i le faitotoa lea. Tusa foi pe fai le leona ma tupu o le vaomatua, e leai lava sona auala faapitoa, poo se faitotoa faapitoa mo ia, e ui uma i le faitotoa e tasi na poloai ai le Atua ia Noa e fai.
O le Titanic e faailoga tagata ma tuu eseese e faatatau i mea e maua, a o le vaa o Noa e tasi lona faitotoa e ui uma ai tagata ma manu. I le Atua lava ia, e tutusa tagata uma, o le Titanic, a e maumea e faapitoa ma amanaia oe. Sa faaleagaina ma malepelepe auā o mea a tagata, o le vaa o Noa sa taunuu ma faasaoina tagata uma sa iai, auā sa faamoemoe tasi mea uma i le Atua.
Ina ua mavae taimi sa tuupoina, ona taunuu lea ma tuta le vaa o Noa. Ua ulufafo Noa ma lona aiga, ua faitaulaga ma faafetai ona o le Atua sa tautaiina lo latou sa. Talofa i le Titanic, sa goto i le moana sausau ma faaleagaina, auā na tautai e le poto o le tagata.
E lei taunuu i le mea sa faamoemoe e taunuu i ai, o miti ma fuafuaga a tagata taitoatasi sa faataatitia ua lē aogā, ina ua lagomau i le alititai le Titanic sa faamaualuga ai manatu o tagata. Sa malaia le faigamalaga, sa lē manuia ana fuafuaga.
Ua tulaueleele Noa ma lona aiga i le lalolagi fou ua saunia e le Atua, auā sa usiusitai ma faalogo. Ua savavali ma fiafia i mea ua toe faafou e le Atua, a o le Titanic, ua leai.
Samoa, aua le faamoemoe i lou poto poo lou malosi.
Aua le faatuatua i au tupe, ae ia faatuatua i le Atua o ia e ana mea uma. O lona malosi e silisili lea, na te lē tuua lau folauga ia goto i le moana sausau e pei o le Titanic.
Sa alu le savaliga a se toeaina ma le atalii o lona atalii. Sa fesili le toeaina, grandson, e te iloa le mamao o le mea lea ua ta iai? Tali le atalii, Papa, e leai.
Sa toe fesili le toeaina, ae e te iloa tonu le mea lea ua ta oo i ai, toe tali le atalii, Papa, e leai. Sa toe fai atu le toeaina, afai e te lē iloa, lona uiga ua e sese, ua leiloa foi le mea e te alu i ai.
Ae tali le atalii, Papa, afai ou te savali faatasi ma oe, ou te lē mafai ona sese. Poo fea lava ta te o i ai, afai lava ta te o ma oe, e lē sese lava la‘u savaliga.
Samoa ma le mamalu o le au faitau, afai e tautai e le Atua lo tatou sa, e tuta manuia, e lē goto pei o le Titanic. A fai foi lou aiga e tusa ma le finagalo o le Atua, e lē faaleagaina lava lou faamoemoe pei o le Titanic, ae vaai ou mata i mea fou ma faamanuiaga ua folafola mai e le Atua mo tatou.
Manatua o le Titanic na fai i le poto o le tagata, na goto. Manatua le vaa o Noa na fau e le Atua, e lei goto. Soifua.
