“E le tau faatali tagata Samoa i fesoasoani mai i fafo” – Palemia
O le saunoaga lea na faia e le taitai o le Malo, le Afioga i le Palemia, Susuga Tuilaepa Lupesoliai Sailele Malielegaoi i tusitala o le atunuu ina ua fesiligia i fuafuaga a le Malo i le tele o aiga ua leai ni fale e foi iai ona ua faaleagaina uma e le afa o Eveni.
“E tatau i le atunuu ua aafia ona maua i le mafaufauga lea o le tagata lava ia tulai e toe faalelei ia,” o le saunoaga lea a le alii Palemia.
Faaalia e le susuga Tuilaepa, o le masani lava lea a le Samoa o le tulai mai i taimi e satia ai i faafitauli o le olaga nei ma toe faalelei lona siosiomaga.
“E le masani ai tagata Samoa e tau faatali fua i fesoasoani mai i fafo. Ua masani lava le Samoa latou e agai e toe atina’e i taimi faapenei”.
O le silia i le to’a 5000 ia sa faamautu i nofoaga e pei o faleaoga a le Kolisi o Samoa, le lotoa a le Iunivesite Aoao o Samoa i Lepapaigalagala, o faleaoga o Falefitu, Moataa ma le Kolisi o Leifiifi faapea ai lotoa a ekalesia lotu i totonu le atunuu, ua faapea ona taape le to’atele i aiga e faamautu ai.
O le manaoga o le Komiti o tali i Faalavelave Matuia, ina ia tapena lelei nofoaga aemaise faleaoga mo le a’e ai o aoga a le fanau i le amataga o le tausaga. O le aso 21 o le masina lenei o Ianuari e toe a’e ai le tele o aoga.
O lea foi ua faaauau lava ona maua faamanuiaga ma fesoasoani a le to’atele ua leai ni fale e toe agai iai e pei o fale ie, o tapoleni, o meafaigaluega mo le tapenaga o fanua faapea meafaigaluega o gasesega o taumafa, lavalava ma afifi mo manaoga o le soifua maloloina faapea ai taumafa ma vaiinu.
O lea ua faaali mai e le Komiti lenei e ta’ua o le DMO ua fatalatalanoa ma aiga uma ua aafia e tatau loa ona agai i ni o latou aiga e mafai ona faamautu ai ae sei toe faamama ma faatino fuafuaga o le fausia o fale ua faaleagaina.
O le to’atele o aiga ua fautuaina foi le toe mafaufau lelei i le toe fausia o ni fale i nofoaga ia na aafia ai i lologa o vaitafe.
E le o iai se faamatalaga ma’oti ua tuu mai e le Malo i fesoasoani mo fale ae e foliga mai e agai lava le aiga latou e toe fausia o latou fale. O le faamatalaga a le Palemia o loo faagasolo lava suesuega i le taimi lenei i nofoaga ia ua matua faaleagaina uma. O lea foi e faatino mo le vaiaso atoa lenei le suesuega a le Faletupe o le Lalolagi, le World Bank ina ia faamautu ai aafiaga ma manaoga o tagata uma ua aafia i le afa.
O loo tele isi mau fesoasoani ae e pei o fale lava le fesoasoani o le a faigata ona faamautu ma e foliga mai e agai lava le aiga latou e faatino lea tulaga.
Ona pau fale ia ua faamautu le maua mai o le fesoasoani e toe fausia ai o faleaoga e fitu ia na malepe i le afa. E $900 afe na foai mai e le Malo o Ausetalia aua le amata loa ona toe fausia faleaoga nei ae na ta’ua e le Matagaluega o Aoga, Taaloga ma Aganuu e sili laititi atu i le $9miliona tala le tupe moomia e toe faaleleia ai faleaoga ua faaleagaina. O le finagalo ua faaalia e le Hai Komesina o Ausetalia i Samoa, Dr Stephen Henningham, ia aoga lenei seleni i galuega toe faaleleia i aoaoga ma ia mautinoa ai e le tuai fua le toe a’e o aoga a fanau i lenei tausaga.
Tumau le numera o tagata maliliu ma leiloa mai i le afa o Eveni
E lei toe maua lava tino o tagata e to’a 11 ia na leiloa i le afa o Eveni i le tolu vaiaso ua te’a.
E to’alima lava ia ua faamautu ua maliliu i le afa ae e to’alua ia o loo masalomia na leiloa i luga o le eleele ma le to’aiva o ni alii tautai sa i le sami i le taimi na agi ai le afa.
O le to’alua ia na ta’ua e leoleo o loo masalomia na leiloa i ga’uta o se alii e 37 tausaga mai i Faleasiu ma se tamaititi e tolu tausaga le matua o lea na faapea na tafea i le va o Magiagi ma Lelata ma o loo talia lava suesuega a leoleo a’o lea ua tolu vaiaso e lei maua lava se faamatalaga i nei tagata.
E lei toe iai foi se lipoti mai i le Ofisa o Leoleo i le tulaga o iai a latou sailiga.
