O tuafafine o ioimata i tuagane, o fea lava e afifio ma sailimalo ai, e maualuga lava le faasinomaga na sasaa faauto mai e tuaa e taitaitama ai le soifuaga faa Samoa i le va tapuia.
Na toe fafagu lea sootaga mafanafana ina ua malaga asiasi mai le aai o Sini le tina ia Ofa ma lona alii le afioga ia Taefu Kesi i si ona tuagane i Melepone le afioga ia Taefu Siumalae Silao, na faamanatu ai le aso soifua o le tina ia Ofa i Melepone, ma ose mitamitaga tele lea i si ona tuagane aemaise o aiga ma uo o alaala ma papaaao i le aai.
Sa maualuga le viiga ma le faaneetaga o le Tapaau o i le lagi, i le sauniga faafetai na saunia e le faafeagaiga ia Pevise Lui, ona alo ai lea i le fiafia faapitoa ma le taumafataga tele. O moomooga alofa mo oe le tuafafine faapelepeleina, faaopoopoina e le Atua nisi tausaga se tele o lou soifua e tautua ai lana afio aemaise o si o tatou aiga.
Alofaaga mai si au fanau pele, aiga uma i Ausetalia, Niu Sila ma Samoa, alofaaga faapitoa mai si au manamea e toatasi o Taefu Kesi, ma alofaaga e le mavae mai si ou tuagane pele o Taefu ma Maanaima Silao ma le fanau i Melepone, Manuia ou faiva ma tiute.
