Na atoa le vaiaso o faasolo pea le fono ma lauga faalaeiau i le afioga a le Atua, aemaise o faamalologa a Rev Sam Sweg i totonu o le laumua, ma na toatele le mamalu o le atunuu na auai atu iai mo le fia faamaloloina o gasegase eseese.
O le po o le Aso Sa na tea nei na faaiuina ai lea galuega faamalolo ma sa faatumulia le malumalu o le AOG i Warspite i Porirua. Na iai se tamā na oo atu ona o le faafitauli i lana vaai ua lē mafai ona faitautusi. Na tuuina i ai le Tusi Paia i le po lea e faitau ma sa silafia ai e le aofia e sa‘o lava ua lē atoa le vaai a sia tamā ona ua na o le tasi pe lava le upu na mafai ona ia ta‘u mai a o lei faia lona faamalologa.
Peitai ina ua tatalo le faifeau ma faatinoina lana galuega faamalolo i lea po ma toe tuu atu i ai le Tusi Paia, sa ofo le aofia ina ua mafai ona faitau mai le Afioga a le Atua, sa faalogoina le taufai pati fiafia o le aofia ma aleluia i vavega ua faatinoina e le Alii e ala mai lana auauna.
E momoli atu ai foi le faamalo ma le faafetai tele i le susuga i le Peresetene ia Rev Dr. Peniamina Williams faapea susuga i faifeau na latou tapenaina le aumai o Rev Sam Sweg o se faifeau ua lauiloa foi i lea taleni o le faamalolo i atunuu i fafo, e faasoa mai lona silafia i le Tusi Paia aemaise o le fesoasoani sili i faamalologa o gasegase e pei ona lolofi atu i ai le mamalu o le atunuu i lea vaiaso tāua.
