Ua tu‘imau faitotoa o faleoloa e lua o le kamupani o le Massah’s i Vaitele-tai ma Vaimea ona ua iai faaletonu ua maua i se suesuega a le vaega o loo lesitala ai kamupani i le Matagaluega o Leipa.
O ia pisinisi mai lona amataga i le lua lenei o tausaga e umia e ni tagata mai Saina. Peitai ua faaalia e le faauluuluga o le vaega o lesitala o kamupani ma le puipuia o meatitino tau fatuga i le Matagaluega o Leipa, le faletua o Margret Fruean, o le tausaga na tea nei na faamavae ai ni alii Saina sa umia sea poo shares o lea kamupani.
O le toe laiseneina o pisinisi ma kamupani i le amataga o le tausaga fou lenei, na tuuina atu ai se faamatalaga e sui o lea kamupani e faapea, ua liliu le lesitala o le kamupani i se tamaitai Samoa talavou e mau paolo i se atalii o Saina faipisinisi ua toe foi. E oo foi i le tulaga o le faatonu o le kamupani poo le Director ua tuuina i ai le suafa o lea tamaitai Samoa.
Peitai na faaalia e Margret, e saili atu faamaumauga na avatu e pei o le pepa faaipoipo ma le pepa fanau, na iloa ai e laitiiti tausaga o lea tamaitai ma e lē faatagaina i lalo o aiaiga faaletulafono tau i le lesitalaga o kamupani ni tagata e lei atoa le 21 tausaga le matua ona avea ma se faatonu.
E faapea mai le tamaitai o Margret, e faato‘ā 19 tausaga o le tamaitai Samoa. E oo foi i nisi o faamaumauga na faaalia e le tamaitai pule sili lagolago ua na o ni fasipepa, ma e foliga e lē o atoatoa ona faia i le amiotonu e le pulega o lea kamupani aiaiga e manaomia faaletulafono.
“O le mafuaaga lena o le matou faaiuga e tapuni le kamupani”. O le isi tulaga na matauina i le sailiiliga e leai se laisene e faafoe ai le Massah’s i Samoa, ma o le fesili tele lea o loo fia maua i ai se tali, pe sa faapefea ona faagaioi le pisinisi a ia tagata mai Saina.
O loo iai masalosaloga pe sa mafai ona faagaioi ona sa faaaogā se laisene o se pisinisi a se isi tagata, aemaise o le amataga o le tausaga fou e amata ai ona toe faafou laisene o pisisinisi uma i le atunuu.
E faia le faaiuga e tapunia lea kamupani ae ua tuanai nai vaiaso sa toe tipoti ese ai ma Samoa se alii faipisinisi mai Saina sa faia sana pisinisi i le atunuu ona ua ia lē tuuina atu faamatalaga sa‘o ma moni o ana teugatupe tau pisisinisi e pei ona manaomia i aiaiga o pisinisi a tagata mai fafo.
O ni alii leoleo ma tagata o le ofisa o le vaega e lesitala ai kamupani i le Matagaluega o Leipa, Pisinisi ma Alamanuia, na faatinoina le malosi o le tulafono o le tuuina atu o le poloaiga e tapuni le kamupani.
E lei pogisa le Aso Gafua na tea nei, aso 13 o Fepuari 2012, ae ua tu‘imau faitotoa o le faleoloa o Massah’s i Vaitele-tai, sosoo ma Farmer Joe, faapea le faleoloa i Vaimea.
Faaalia e le faletua o Margret o loo faasolo a latou suesuega i le tulaga o loo iai pisinisi ma kamupani.
