O le vaiaso lenei ua usuia ai le Koneferenisi a le Ekalesia Metotisi i Samoa… o se fono faaletausaga ua vaaia ai foi le tumutumu o le atunuu i sui usufono o matagaluega o le ekalesia i vaega eseese o le lalolagi ua faapea ona taunuu mai i Samoa mo le lua vaiaso o fonotaga ma talanoaga o mataupu eseese i le atinae o le Ekalesia i Samoa ma ona lala i atunuu mamao.
A o lei usuia la le Koneferenisi e pei ona amata e le mafutaga a tina ma ana fonotaga i lenei vaiaso poo le Auuso Fealofani.
O lea na faatasi uma taitai o le Ekalesia faatasi ai taitai o le atunuu ma le Kovana o Amerika Samoa auā le faapaiaina o se galuega tele a le ekalesia ua savali i le tolu tausaga talu ona faatino.
O le malumalu lea o le Ekalesia i lona laumua i Fogaa i Faleula.
O le aso 13 o le masina o Iulai o le tausaga e 2009 sa faavae ai le amata mai o galuega o le malumalu, ma o le taimi lea o loo tulai mai Rev. Afereti Samuelu i le tulaga Peresitene i le Ekalesia Metotisi.
O le agaiotupu sa faatinoina le galuega o le Afioga ia Lemalu Saeni Lemalu.
Sa totogi vaiaso foi e le Ekalesia nisi o alii kamuta se to‘a 40 e fesoasoani i le fausia o le malumalu.
O se malumalu ua tele foi felafolafoaiga ua fai i ai ona o le umi tele ona faatautaia.
E ese le konekarate na amata maia ae mae‘a le tausaga ae laga le lē fiafia o nisi ona o le manatu ua soona faaalu seleni a sui aulotu o le ekalesia ae e lei taitai le galuega.
O le taimi lea na oo lava i le tusa ma le miliona tala le tau o le galuega.
E ui i lea, na vave ona toe fetuunai le faatinoga o le galuega ma le tele o manaoga ina ia lelei mo se taimi umi totoga ma le fausaga atoa o le malumalu.
O le nofoaga lea e i gauta o le malae oloo iai ofisa o le ekalesia lea e silafia e le atunuu o se laueleele gaoā tele, sa ola ai foi le vao ma o le konekarate a Lopaoo Tanielu Mu‘a sa feagai ma le suaina o le fanua ma sa faafetaia e le Ekalesia lea galuega tele ona e fai si faigata.
O le faamoemoe atoa o le falesa na saunoa le failautusi o le koneferenisi, Rev Vaiao Eteuati, sa lava tapena i ai le Ekalesia ina ia mae‘a lea galuega.
“O le 90% pasene o totoga o le malumalu, sa auina sa‘o mai Niu Sila,” o se saunoaga lea a Vaiao. Na faafetaia e le Ekalesia konekarate uma sa galulue faatasi mo le fausiaina ma le faaleleia o itu uma mo le malumalu.
Sa foai foi le Ekalesia atoa i fesoasoani mo le falesa, ma o se faamoemoe lava ua tino mai e aogā mo le Ekalesia atoa mo tapuaiga.
O le Peresitene o le Ekalesia Metotisi, Tupu Folasa II na taitaia le sauniga aloaia o le tatalaina o le falesa, ma na otiina le ripine e lona faletua, Alaimalo Tupu Folasa.
Sa auai foi le Ao o le Malo, Tui Atua Tupua Tamasese Efi ma lana masiofo ia Filifilia, faapea sui o le faiga malo a Samoa e molimauina lea faamoemoe.
O le Afioga Togiola Tulafono le kovana o Amerika Samoa ma lana masiofo, o malo faaaloalogia ia mai Amerika Samoa na auai mai i lenei sauniga.
O le mae‘a o le sauniga lotu na faagasolo ai loa faafiafiaga na saunia e aoga a le Ekalesia ma nisi o Sinoti sa valaaulia e faafiafia.
Na faaalia e le Failautusi o le Ekalesia o le maioio ai o le galuega tele lenei o le a mafai ona folasia i le Koneferenisi a le Ekalesia.
