E leai se isi e talitonu pe a faamatala i ai gaioiga matagā na faatonu e se matai ua matua se teine sa ia faafaigaluega na te faia ia te ia (matai o loo molia).
O loo tuuaia lea tamalii ua lauiloa i ona tiute faatautua lotu, nuu, itumalo ma le Malo i ia faiga, ina ua faaulu i leoleo le tagi a le mafine sa ia faafaigaluega.
Ua le mafai ona faailoa le suafa poo se isi faamatalaga e iloa ai lea tamalii matua ua lata i le 60 tausaga o lona soifua, ona o se poloaiga a le faamasinoga.
E oo foi i le tamaitai e le o mafai ona faasalalau faalauiloa lona suafa poo nisi faamatalaga e iloa ai lona tagata.
O le Aso Faraile 29 o Iuni 2012 na tuuina atu ai folasaga ma finauga faaiu a leoleo faapea le loia a lea tamalii mo se iloiloga a le faamasinoga e fua i ai sana faaiuga, i le faamaonia poo le lē faamaonia o moliaga e sefulu.
O le folasaga a loia a leoleo sa toe faatepa ai le faamasinoga i le ogaoga o le solitulafono, lea e faapea sa taumafai lē ua molia e sogi i le tamaitai i le taeao o se tasi o aso na usu atu ai e faigaluega. O se tasi la o aso na faatino ai loa nisi o gaioiga matagā e le tamaitai i le tamalii ua tuuaia.
O nei gaioiga uma e matagā ma o le a lē faamatalaina i lenei lipoti ona e liolio i le va tapuia o le mamalu o le aufaitau nusipepa, aemaise o le tatou tu ma le aga i fanua.
Na faaalia e loia a leoleo sa iai, se faamatalaga a lē ua molia i le tamaitai na ia faaalia ai, o mea na tutupu i le aso lea e gata ai lava i le potu na tupu ai ma ia aua ne‘i iloa e se isi.
O le finauga a le loia a lē ua molia sa ia faatepa ai le faamasinoga i le mea na tupu ma mau a leoleo, ona e leai ma se molimau a leoleo sa ta‘ua ai sa faatino e lē ua molia se solitulafono i le tamaitai, se‘i vaganā le gaioiga na ia faatonuina e faia e le tamaitai, lea sa molimau ai le mafine i le faamasinoga sa ia faia ma le loto malie.
Peitai o se isi vaega o le molimau a le tamaitai na ia faaalia ai i le faamasinoga e pei ona toe faamanatu e loia a leoleo, sa ta‘ua e le mafine lona mā ma le masiasi i le mea na tupu.
E manino i molimau a leoleo e pei ona faaalia e le loia a lē ua tuuaia, e leai ma se gaioiga a lē ua molia e faapea na taumafai ai e faamalosi le faatinoga o le gaioiga matagā.
Peitai e iai se faamatalaga a lē ua molia na fai i le mafine, e pei ona faamanatu e loia a leoleo i le faamasinoga e faapea, na fai atu ai le tamalii i le tamaitai e alu ane e fai lana galuega ua masani ai.
O finauga nei a loia ua manatu le faamasinoga e lua vaiaso e silasila i ai, ona aumai ai lea sana faaiuga i le aso 19 o Iulai 2012.
O le matai matua o loo molia o loo galue nei i se tasi o matagaluega a le Malo.
