O se saunoaga lea na fofogaina e le Fofoga Fetalai o le Maota Fono Faitulafono na mafua ona o le mau ua sese se lipoti a se tasi o nusipepa e faatatau i taualumaga a le Palemene. E lē gata i lea o le popolega o le Fofoga Fetalai i le lipotia e tusitala o “tala salatua” o loo lafo i totonu o le Maota.
O le mau a le Fofoga Fetalai, le Laaulialemalietoa Leuatea Polataivao, e faaeteete ona o felafolafoaiga a le Palemene o loo faamauina i le Hansaad, e tatau ona sa‘o ma o le taulai o lipoti i faamatalaga salatua e lē talafeagai lea ma le galuega o loo faatino nei.
E lē o taofia e le Fofoga o le Maota Fono le faatalanoa e tusitala o sui a faipule i fafo o le Palemene ae ua tamau lona finagalo ua lava saunoaga aloaia e tatau ona agai i ai lipoti a tusitala.
I sana faatalatalanoaga ma le TVOne na ta‘ua ai e lea ofisa faasalalau o loo iai i lalo o le Tulafono Faavae o le Palemene le malosiaga i le Fofoga Fetalai e faasā ai tusitala ona toe ulufale ma saofafai ai i totonu o le Maota pe a lē usitaia lana faatonuga ua fofogaina.
O taualumaga foi o le Palemene i le vaiaso ua tuanai e faalua lava ona lauga ai le Alii Palemia ma laga ai le agai o sui a faipule o le Tautua Samoa, le Itu Agai, i luga o le TV i taimi uma e fia faalauiloa ai o latou finagalo.
Ua ia ta‘ua e agai mai lava “tamaiti ma teineiti” o le vasega o tusitala e “faavevesi” ma alu atu ai lava le Tautua Samoa.
Na faalua lava ona faia ia faamatalaga i totonu o le maota ma lipotia e ofisa faasalalau faapea nusipepa ae o lea la ua toe laga e le Fofoga Fetalai, o ni tala salatua ma e lē aloaia.
O le faafitauli e pei ona faaalia e nisi o tusitala o le atunuu, e lē mafai ona tuua le lipotia o soo se felafolafoaiga e agiga i totonu o le Palemene.
O loo faapea foi ona iai le puipuiga i sui a faipule pe a lafo faamatalaga i totonu o le Palemene ma e aupito faaeteetegata atu le lipoti o faamatalaga i fafo atu o le Palemene nai i lo totonu.
Ta‘ua e Laauli, e leai se pa puipui o nei faasalalauga, ae e sese loa ona tulai mai ai loa lea o atugaluga o le Palemene, ma e mafai ona ave i le tulafono e le Palemene soo se tusitala e faia ni lipoti sese e faatatau i felafolafoaiga nei.
Mo tusitala o aiaiga o le fa’atinoga o le latou auaunaga ua tali tutusa lava galuega ua faasalalau ai faamasinoga ma le Palemene. E iai le puipuiga i totonu o le faamasinoga mo le lipotia o soo se mataupu e faalauiloa ai.
E iai le faaeteetega i lea puipuiga pe a faatino faatalatalanoaga i fafo o le Fale Faamasino ma e faapena foi i totonu o le Palemene ma fafo atu. E iai le puipuiga o faipule e iai foi le puipuiga lea i tusitala, ae o fafo atu o le Palemene ua leai se puipuiga lea ma e faaeteete lava le faatautaia o ia lipoti.
O le sese o le lipoti pe o totonu o le Fale Faamasino poo totonu foi o le Palemene, o iina loa la e afaina ai le galuega faatusitala.
Faaalia e le alii Fofoga Fetalai, o loo faataatitia nei fuafuaga tetele auā le faaleleia o le fesootaiga lenei i le va o tusitala atoa ai faipule o le Palemene e ala lea i le fausia o nofoaga mo tusitala i totonu o le Palemene, o le faaleleia o nofoaga o le a mafai ona pue ai ata o televise ma faaleleia atili fesootaiga o leitio aemaise o potu faapitoa mo tusitala o nusipepa.
“E tele fuafuaga mo le Palemene fou i le galuega lea ua fuafua ona o le taumafai lava ina ia faaleleia le tou foi auaunaga, ae a tulai mai loa faafitauli e pei ona ta‘ua, ona ou popole loa lea auā e tatau lava ona puipuia le Palemene,” o se saunoaga lea a le Fofoga Fetalai.
O le taimi lenei e lē o faatagaina le pueina e le televise o taualumaga o le Palemene se‘i vaganā ai le leitio a le Malo le 2AP.
