“O lē lava e tago i le pelu e faatauma‘ai ona itu, e toe lavea ai lava”.
O le fautuaga lea a le Palemia i sui tauva e lei manumalo i le palota ae o loo latou maua le ‘afa o palota a le sui manumalo e mafai ai ona faaulu ni a latou tagi i le faamasinoga.
Ua laumanu‘ia solo tala i ni vaaiga o ia solitulafono sa tutupu i le aso o le palota tele a le atunuu.
O nisi ua latou faaalia e iai nisi o fale palota i le taulaga o Apia sa vaaia ai ia gaioiga e pei o tufaga tupe sa monomono i tagata.
O isi ua molimau mai e iai sui tauva sa fai a latou meaai sa tufa i tagata palota. O isi ua molimau mai e faapea, e iai sui o komiti a nisi sui tauva sa latou faafeiloai tagata palota pe a taunuu, ma fai i ai e manaomia o latou suafa uma e tusi i le lisi, ona o loo manaomia mai e le sui tauva e faatino i ai sana meaalofa pe a uma le palota.
O isi o molimau e faapea o nisi tagata e aiga ma tau i se sui tauva, e tutū lava i laina uumi ma alu le tala‘iga i tagata o latalata ane, e vaai e palota mo le sui ua tatau ona tulai mai e fai ni suiga mo le itumalo, poo se sui ua agavaa ma e iai ni ona faailoga ma e poto e avea ma sui faipule o le itumalo.
O nisi foi ua latou faaalia, o le po a o lumanai le aso o le palota, sa feoai sui tauva ma sui o a latou komiti ma afeafe i fale o aiga, ma faatauanau e palota mo le sui lea ma le sui lea.
E faato‘ā manino le mata o le vai i le mae‘a o le faitauga aloaia o loo nafa nei ma le Komesina o faiga palota ma lana aufaigaluega, pe iai ni tagi pe leai.
O le Tautua Samoa ua faaalia e lo latou peresitene e maua lava le sefulu ma ona tupu o sui e lei manuia o loo mafai ona ave a latou tagi o faatosina eleelea.
O le HRPP foi o loo laumanu‘ia le sauni o nisi sui tauva sa tulaga lua a latou palota e faato‘ai ni tagi faasaga i sui faipule o le Tautua Samoa ua manumalo mai.
E lē faigofie le taunuuga o nei tagi pe afai e faasaga foi se tuuaiga a se sui manumalo i se sui na tulaga lua pe tulaga tolu o maua le ‘afa o palota na manumalo pe afai o le a latou faaulu ni tagi.
O le fautuaga foi lea a le taitai o le HRPP ia latou sui tauva a o lei faia le palota, ina ia tuu le avanoa i le sui ua manumalo.
Peitai o se fautuaga e lelei i se isi itu, ae e leaga i se isi itu, auā afai na tutupu ni solitulafono o ni faatosina palapalā ma eleelea, e lē tatau ona natia ma tanumia ae e ao ona faato‘ai i le faamasinoga o loo iai le faaiuga tonu mo ni solitulafono e faatino e nisi, aemaise lava o gaioiga lē manuia e faia e nisi sui tauva ona o le fia maua o le manumalo.
Ua faaalia e Tuilaepa i se lipoti a se tasi o fale televise, afai o foufou nisi e faatino ni tagi, e ao ona matuā malamalama ma silafia lelei, o se tagi o faatosina o le palota e pei o le pelu e faatauma‘ai ona mata, e ma‘ai uma.
O le a nofonofo ai sui o le HRPP ua manumalo e sailia foi ni tuuaiga o faatosina lē lelei na faia e sui o le Tautua Samoa.
O le lapataiga a le Palemia i le Tautua Samoa, o a latou nofoa e 13 ua manumalo ai, ina ne‘i avea ni tagi o le palota e faaitiitia ai lea numera, ma oo ina na o le tasi ai le nofoa e maua e lea vaega faaupufai.
Na fesiligia le taitai ua toe filifilia o le Tautua Samoa le afioga Vaai Papu i ni tagi a le Tautua Samoa, ae na ia faaalia o le mea foi lea o loo silasila toto‘a i ai, ia matuā mautinoa e le sui o le a tagi, e leai ni tuua‘iga o faatosina eleelea e lavelavea ai.
O nofoa e 13 ua maua e lea vaega faaupufai na faaalia e Vaai o se numera lelei tele e faavae ai se itu faaupufai ua aloaia o le Itu Agai, pe a fua i le paeaiga na tea nei.
O le paea‘iga foi o le 2001 i le 2006, e lei toe iai se vaega faaupufai aloaia e avea ma Itu Agai, ina ua suia e le igoa o le SNDP sa aloaia i lea paea‘iga faapalemene o le Itu Agai, i le igoa o le SDUP.
Na faato‘ā aloia le SDUP o se Itu Agai i le paea‘iga o le 2006, peitai e lei atoa se tausaga talu ona mae‘a lea palota tele, ae malepe ma salalautasi le SDUP ma lē toe aloaia ai o se Itu faaupufai e agaia le Malo, ona ua faaitiitia o latou faipule ma lē maua le numera e aloaia ai.
O le isi foi o mafuaaga ona ua sui atu le taitai o le Itu Agai, ae ua mae‘a ona faamauina aloaia le taitai o le Itu Agai sa iai le afioga Le Mamea Ropati.
O vaega uma ia e ao i le Tautua Samoa ona silasila toto‘a i ai, ina ne‘i toe afaina ai le maopoopoga ua iai nei, ma lē aloaia ai o se Itu Agai i totonu o le Palemene.
