Ua lē iloga se vaega o le taulaga o Apia e vaaia ai nisi o le atunuu ua faia le uiga lea o le aisi solo.
Ua tumau lava ni tamaitai se toalua – o le isi taimi ua toatolu, o luma o le KK Supamaketi i Matautu-tai, o luma o le Faleoloa o Faatoaga tuai lea ua fausia ai nei faleoloa mo le Flea Market i Savalalo, o luma o le ANZ ma isi itu o faleoloa tetele i le atunuu, ae o nisi ua faasavali lava ona fai lea taleni fou o le aisi.
E te‘i lava le tagata o loo fealuai i le taulaga ua faasalavei ane se alii a o se tamaitai foi ma e tele ina ta‘ita‘i atu pe tasii atu foi fanau ona momoli loa lea o aisiga mo tagata lautele e alolofa atu i sina tupe e mafai ona avatu mo se pasese, o se meaai poo se meaai a le pepe poo le tamaititi lea e o atu faatasi.
O le toatele lava ua ave sa‘o tupe ma savali ese ae o nisi ua matuā tutū lelei lava ma fai le otegiaga.
Ua iai la le isi au aisi lea ua matauina nei ma ua faamaonia foi e nisi o tagata o le atunuu ua faigaluega i le feaveaiga o tagata tafafao maimoa mai i fafo.
Ta‘ua e se tasi o pueata na feoai faatasi ma tagata tafafao mai i Amerika, o le faalua lea ona ia molimauina o se tasi o nuu i le Anoamaa, e taofi loa iina se pasi ae agai i fafo turisi, alu atu loa ma le solo a tamaiti.
E lē tele lava ni tala se‘i vaganā ai, money, money for me please.
Tupe mo a‘u faamolemole. E pei lava ona vaaia i ata o lenei lipoti, na vave lava foi le tali ane a loomatutua ma toeaiina tafafao.
Na ona fetagofi lava i taga aumai i fafo tai $1 tala Amerika ma tufa loa i fanau.
O le uiga o tamaiti e uma le isi papalagi agai i isi papalagi ma na faapena lava seia uma uma le pasese o le pasi lea na agai atu i lo latou nuu e molimauina nisi o mataaga ua i lea itu o le atunuu.
E fai faiga nei a le fanau ae o loo potopoto taulelea o le nuu lea ua sauni mo le leoleoga o le sa a le nuu i le po, ma na ta‘ua e le au pueata nei, e oo lava ia i latou na, ua manatu tamaiti o loo malaga sa‘o uma mai i Amerika ma faasolo atu i ai le aisiga.
E foliga mai i le molimau a lē na pueina ata o le lipoti lenei, o loo iai tagata matutua o loo faaoso fanau e fai nei uiga, ma ua na ona potopoto ane o le au matutua i autafa o le nofoaga o loo iai tagata tafafao mai.
Ua faaaauau polokalame e aveese ai fanau e tatau ona aooga mai auala tele o Apia ina ia aveeesea ai foi lea numera toatele o le fanau ia e lē o toe aooga, ae o lea ua vaaia le fanau ua alu i le vaega o le au aisi.
O tagata matutua na tele ina vaaia o faia nei uiga, ae o fanau laiti ia e fou nei ia vaaiga i le taulaga, aemaise o afioaga i tua. O le tulaga faanoanoa o le alia‘e ai o nei faiga ua tutusa ai lava Samoa ma atunuu i fafo e pei o Initia, Indonesia ma isi itu o Asia, ua pei lava o le mea fua le tuu o fanau e aisi ma taumafai e faatau ane oloa i tagata feoai ma o tala ave a nei tagata tafafao mai o le a mautinoa le afaina ai o tagata malaga asiasi mai i Samoa nei.
O le isi foi popolega o le uma o le aisi ae se‘i loa le ato a le turisi ma oo atu lava i nisi tulaga lē talafeagai e pei o le osofai ai o tagata tafafao maimoa mai i fafo.
