Ua amata ona vaaia le tele o lapataiga ua faagasolo i luga o le televise ma leitio faapea nusipepa e faatatau i le tāua o le puipui o le atunuu mai le pepesi o faamai.
Ua mautinoa le faatuputupulaia o le numera o tagata ua aafia i le flu.
Ae na tapā se finagalo o le Vaega o Auaunaga faafomai pe mafua ia lapataiga ua sosoo mai i lenei vaitaimi ona ua lautele le pepesi o faamai, ae na ta‘ua e le tamaitai fomai sinia, le Afioga Uitualagi Dr Tia Vaai, o le galuega ua fai nei o le muamua faamamafa le faalauiloa ae faaitiitia ai le aafia o le atunuu.
“O lea ua amatamea le Matagaluega o le Soifua Maloloina, e sili ai lea nai lo le toe avatu o lapataiga ae ua tuai ua pepesi faamai.
O le tele ia o le mau siama e aafia ai i le flu ma o le fautuaga muamua lava ina ia lava le mālōlō o le atunuu aemaise o le lelei ma le mamā o le siosiomaga e soifua ai”.
Ta‘ua e lenei tamaitai o loo toatele ua siaki ma togafitia i le flu, ua toatele foi nisi ua iai masalosaloga e ono iai nisi ua aafia i le gasegase o loo feaveai e le namu, le dengue fever, peitai e lei faamaonia lea tulaga ona e tatau ona faamautu mai i le sailiga o le toto poo ai ua maua i lea gasegase.
O le amataga o le vaiaso na tea nei na maliu ai se alii a‘oa‘o o le Kolisi faafaifeau a Malua ma na iai masalosaloga e mafua mai ona o le dengue fever.
O le faamatalaga a le tamaitai fomai sinia o le Falemai i Motootua o loo tālia le faaiuga o suesuega ma se lipoti mai i le fomai na tiute ma vaaia le alii a‘oa‘o ae ona pau le tulaga e mafai ona faamautu mai, e lei laga le dengue fever o se mafuaaga o le gasegase o le alii a‘oa‘o.
E maliu Tupu Tiatia o lona tausaga lua lenei i le Aoga Faafaifeau a le EFKS ma e na o le 35 tausaga o lona soifua ae maliu o ia.
Faaalia e le tamaitai fomai, e faigata tele lava foi ona aumai se tali seia mae‘a ona faatino suesuega i lea mataupu aemaise foi le tulaga o loo iai isi gasegase ua masalomia o le dengue fever seia mae‘a ona faafoi mai toto ua ave i fafo mo sailiiliga.
O loo iai foi se isi gasegase ua pei lava o le dengue fever na ta‘ua e le tamaitai fomai ua aumai ai se lapataiga mai i le Faalapotopotoga o le Soifua Maloloina a Malo Aufaatasi le WHO, i totonu o le Pasefika.
O Niu Kaletonia lea na maua ai le lipoti o se tagata e toatasi ae e lei mautinoa poo ua aafia ai nisi i Samoa ae o loo masalomia lava, a lē o le dengue fever o le gasegase lea ua ta‘u mai le maua i isi motu o le Pasefika.
Ona pau lava la le tali a le Matagaluega o le Soifua Maloloina o loo faatino nei, o le faalauiloa ina ia mafai ai ona faamalosia puipuiga o le atunuu.
O le tetele o timuga i le amataga o le tausaga aemaise o le tulai mai o vaitau o mugala ua vaaia ai le toatele ua aafia i le flu.
Ona pau le faamaoniga e lē o pepesi le flu e lē o pepesi foi le dengue fever.
O fautuaga masani, ia mamā le suavai taumafa, ia mamā nofoaga i maota ma laoa, ia lelei le sauniga o taumafa ma ia taumafai e lava le malologa.
