E maeu le suamalie ma le toafimalie o moomooga o le loto ina ua tuufaatasia fatu e lua e avea ma loto e tasi ma ua fusia e le alofa, ua faatinoina lea e pei ona tulimatai ai e le alii o Evan Brown lana manamea o Lupe Mesepi Leota, la te osi feagaiga e ala i le faaipoipoga i le Celebration Centre i Kalaiesetete.
O le aso ua ula, o le aso ua matagofie, ua ogatasi le futia ma le umele i se finagalo o le aiga fou ma ua faataunuuina ai le faamoemoe auā ua suluia pea i ave malolosi o le Talalelei.
O lenei faamoemoe ma le sauniga o le faapaiaina sa faataunuuina i le Aso Toonai, aso 26 o Mati ma taitaia e le susuga Pastor Mato Setu o Aukilani, sa faatasi atu i ai le susuga Rev Time Taotua ma le faletua. Toatele le mamalu o le valaaulia na auai aemaise aiga malaga mai Samoa ma Ausetalia.
O le tamaitai faaipoipo o Lupe Mesepi o ona tuaa o le afioga Leota Fau Leota (Fogapoa) ma Ututaufao Setu-Leota (Tuasivi / Iva), lea ua osia nei le la feagaiga ma le alii Europa o Evan Brown. I se molimau a le afioga Leota i lona afafine na ia ta‘ua ai le tausi matua, tausi aiga, tausi fanau o lenei tamaitai, ma o ia foi o le poutu i totonu o le aiga i le va faamatua ma fanau, ma ua matua laki lenei alii Europa ona o le tauagafau o lona toalua faaipoipo. Peitai na tulai foi le tuaa o le alii faaipoipo ma faaalia lona fiafia ua maua se faiava palagi i totonu o le aiga, ma faafetaia le amanaiaina o si ona atalii.
O le taumafataga tele sa faia lea i le Riccarton Workman’s Club, ma na faamalieina le mamalu o le atunuu ma le valaaulia i le felanulanuai o le fofoga taumafa i ona tulaga eseese aemaise le vai taumafa. O le tofa Namulauulu Sami Leota (Ausetalia – tuagane o le teine faaipoipo) sa fai ma fofoga o le aso, ae i le mae‘a ai o le taumafataga e tusa ai ma aso faapenei, o le tofa Namulauulu Lameko (Samoa) sa fetalai e fai ma sui o le aiga e momoli le faafetai i le auvalaaulia e tusa ai ma le afifio mai e molimauina le aso fiafia o le ulugalii fou.
O le maitau a le tusitala i lea aso, e ese le tomai o le alii faaipoipo i le asaina o le la keke faaipoipo, masalo ua leva ona fia ipo, ae ina ua alo atu Lupe i lana sausaunoaga matagofie, ua na o le silaloa o Evan ma maitau le vavai o taga eseese a si ana manamea, ae o le o foi a loomatutua latou ua lē mafai ona tau taofiofi. E avatu ai faamanuiaga ma alofaaga a le tatou nusipepa ina ia manuia tele le aiga fou i le agalelei mai o le Atua.
