Sa to‘ulu timuga i ni vaega o Samoa i nai vaiaso ua mavae, ae o le faalavelave ua na o nai suavai e maua ai ma tea ai le pefu o alatetele, ae o loo matutu pea le eleele ona o le malolosi o mugala.
Ua savalia nei le 7 vaiaso o aafia pea le atunuu i mugala ma o popolega ia ua mafua ai ona ave le lapataiga a le pulega o le malosi tau eletise le EPC (Electric Power Corporation) i le atunuu ina ia faaaogā ma le fuafua lelei le eletise, ona ua faasolo ina matutu ma faaitiitia le suavai o loo pueina e vili ai le eletise i nofoaga o iai afi eletise e gaosi mai le suavai, e pei o le afi i Ta‘elefaga i Fagaloa.
O popolega o le EPC, a faaauau pea le tulaga o iai nei i le lē maua o ni timuga mamafa e toe faateleina ai le suavai maua e faatanoa, o le a iai loa le faatatau e faasoa atu le eletise i le atunuu. O se faiga o le a fua ai le ola o le eletise i itula o le ao ma le po.
O le a lē lelei lea fuafuaga mo le atunuu pe a fua i auaunaga ma galuega e manaomia ai le eletise, peitai ua na o le pau lea o le laasaga e mafai ona maua ai pea le eletise mo se taimi a o tatali le toe faateleina o le suavai i nofoaga o pueina ai mo le gaosiga o le eletise, pe a palasi ni timuga mamafa.
O Novema o loo vavalo le vaaitau ma le pulega o le suavai e faato‘ā tetele ai ni timuga. O le faaiuga o le vaiaso na tea nei na faalauiloa ai e le pule sili o le pulega o le suavai a le Malo, le afioga Ta‘inau Moefaauo Titimaea le sauni o le pulega e faatino auala talafeagai uma mo le mauaina pea o le suavai taumafa, pe afai o le a tulai mai ni tulaga ogaoga i le faaitiitia o le suavai.
O le motu o Savaii ua faaalia e nisi mai le afioaga o Salailua lea e iai le latou faatanoa i uta o loo sau ai le suavai, ua matuā maualalo le suavai o loo iai ma o le faato‘ā iloa ua fai ma pepe paipa o le nuu.
O afioaga o loo iai pamu vai, na faaalia e ni molimau o loo maua le suavai mai pamu ae o le lave e mai, e lē pei o le vaiauli magalo o loo maua i vaitafe.
I Upolu o loo iai foi vaega o nuu ma afioaga o loo mafatia i le mamate o paipa mo ni itula ae faato‘ā susua i po ma itula amata o le taeao.
O nuu na aafia i le sunami o loo faia i ai le galuega o le la‘uina o le suavai ma teu i tane, ona o nuu e pei o Saleapaga ua lipotia foi le utiuti o le suavai maua.
Faaalia e le Palemia susuga Tuilaepa L Sailele Malielegaoi, o gauta o Saleapaga o loo iai mauga o iai le vai e ta‘ua o Lano.
Peitai o le see i uta o le nuu ona o le sunami, e ono aliali mai ai ni faaletonu i le lumanai i le vai o Lano, pe a tele ina ta i lalo laau e pueina le suavai. Faaalia e le Palemia, o se itu o le a silasila i ai le matagaluega o Punaoa Faalenatura ma le siosiomaga.
