E oo mai i le taimi e lolomi ai le tatou pepa ua atoa lelei i ai aso e fa talu ona taumafai e aumai se tali i le Ofisa o le Fono a le Pasefika i Suva i Fiti e faatatau i le fesoasoani lea ua ofo atu ia Tuvalu ona o le tulaga pagatia o lona suavai ua iai nei.
O le mafuaaga o le tulituli o se faamatalaga mai i lea Ofisa ona o lea faato‘ā gaioi e ave se fesoasoani ae ua leva ona iai se vaega tupe na tauaao i ai e le Malo o Iapani mo le faatuina o ni nofoaga e faamagalo ai le suasami i atumotu e matuā utiuti le suavai maua ma ia faaola foi i ni afi e maua mai le malosiaga i le la.
E tolu lelei vaiaso talu ona faalauiloa e Tuvalu ua i se tulaga pagatia ona o le leai o se suavai maua, ae faato‘ā faamautu se vaega o le fesoasoani lenei a Iapani e tauaao i ai.
Ona pau tali o loo aumai i le imeli, ua tumu le pusa meli a le Ofisa lea i Suva, ua lē mafai foi ona toe lafo le meli.
Ana lē alu atu i ai ma faamatalaga e faamalo ai i le ‘alo ma le lē aumaia o se tali i le tuai o le gaioi e faatupe nei atina‘e mo motu laiti o le Pasefika, e lē tuu le toe faafoi mai o fesili na tuu atu i ai.
E fa miliona tālā le tau o ni masini o le a mafai ai ona faatino le faamagalo o le suasami auā le suavai maua e Tuvalu atoa ai ma se afi o le a faaola i le malosiaga o le la e faatautaia ai lea galuega tele i le suavai o lea motu.
O se tupe ua faamautu mai e le Fono a Pasefika le FORUM i lona ofisa i Suva ua auala mai e le Siosiomaga o le Pasefika le PEC.
Faaalia e le failautusi aoao o le Fono a Malo o le Pasefika le afioga Tuiloma Neroni Slade ua talafeagai lelei lava lenei fesoasoani ma le tulaga faigata ua iai nei le mugala o loo feagai ma Tuvalu i le taimi nei.
O le aso 28 o Setema lea na faalauiloa ai le tulaga faaletonu ma le matautia ona o le leai o se suavai maua. Ua tolu tausaga o faamauina le maualalo tele o le suavai maua a lea atunuu.
Ua iai se masini e faamagalo ai le suasami na tuuina atu e Niu Sila mo Tuvalu auā le tali vave atu i le faaletonu o iai nei, ae o lea la ua iai se isi fesoasoani e pei ona faalauiloa mai e le Ofisa o le Fono.
E faalauiloa lea fesoasoani ae o le aso lea e taunuu mai ai le vaa o Amerika lea e ta‘ua o le MV Walnut na faapea ona taamilo i le atu Tokelau ma le fesoasoani muamua a Niu Sila ina ia soo le faasoa o le suavai i lea foi tuaoi o le atu Samoa. O le iai i Samoa o le a faalauiloa atili ai fesoasoani a lea foi malo e ala i le ofo atu o auaunaga e pei ona vaaia nei i Tokelau.
E lua lelei afi o le a maua mai i le la lo la malosiaga o le a faatutū i Tuvalu mo lenei faamoemoe o le suia o le suasami i le vai magalo. Faaali foi e le faasalalauga lava lenei mai i le Ofisa o le Fono a le Pasefika, e tusa ma le 38 tone o le suauu faatau mai i fafo o le a faasao i le tausaga e Tuvalu, ma o le a saga tuuitiitia ai le suauu susunu mo le gaosiga o le eletise e faaola ai afi fou e pei ona ta‘ua.
O Tokelau foi ua faalauiloa le faaletonu ua iai ona o mugala lava. O le taimi lenei o motu nei e lua ua faatofutofusia nei i le suavai mo lenei taimi ae o loo tālia la le faatautaia o ni fesoasoani mo se taimi umi e pei ona iai masini nei ua tuuina atu mo le maua ai o le suavai magalo mai i le sami.
O le fesoasoani ua faamautu nei mo Tuvalu na pasia i ni talanoaga na faia i le faaiuga o le vaiaso na tea nei ma o le sainia o lea fesoasoani i lenei vaiaso e amata ai lava ma le galuega tele o le faatuina o lenei nofoaga mo le faamagalo ai o le suasami aemaise o le afi lea o le a maua mai i le malosiaga o le la.
O se vaega lenei o le fesoasoani mai ia Iapani ua patino tonu lava i galuega e pei ona ta‘ua, ma o se fesoasoani e mo motu o le Pasefika ma o loo faapea ona faasoa mai e le Ofisa o le Fono a Malo o le Pasefika le Pacific Island Forum. E tusa le tau atoa o lenei fesoasoani faaletausaga ma le 66 miliona tala Amerika.
E oo mai lava la i le taimi lenei e lei sau lava se tali mai i lea Ofisa pe o le a aofia Tokelau i lenei fesoasoani, ae pe aisea foi na faatalitali ai lava seia pagatia tagata nei faato‘ā mafai ai ona faia se faaiuga e ofo mai lea fesoasoani tele.
