O Aukuso o le tausaga e 2010 na fono ai Lufilufi ma faia le faaiuga e tea le Tui Atua ma le nuu ona ua tiga le nuu i le galuega o le maota o le Tui Atua i Mulinuu ma Sepolataemo. Na faaalia e se tasi o matai o Lufilufi i lea vaitaimi le tofa Feesago Lopi, ua lagomia le finagalo o Lufilufi ona ua lē logoina i latou e tusa ai o le fausiaina o le Maota.
O le mataupu lenei sa ave ai le talosaga a le Tui Atua i le Palemia e faia se Komiti Suesue e suesueina le faaiuga a Lufilufi ua faia ia te ia, peitai, na toe tafa le finagalo o le afioga i le Tui Atua ma ia toe talosagaina le Palemia, e taatia le suesuega, o le a taoto ai pea ia i le tulaga ua iai se finagalo o Lufilufi i le mataupu.
Sa faapea foi ona taumafai le Ofisa Sili o Faamasinoga i lea vaitaimi, le tofa ia Masinalupe Tusipa, e talo se feiloaiga ma Lufilufi e faamanino ai iuga ua mae‘a ona taoto i le Famasinoga o Fanua ma Suafa e faatatau i le maota o Mulinuu ma Sapolataemo, o lea ua manino mai ai, o ai lava e umia le suafa Tui Atua, e pei ona umia nei e Tui Atua Tupua Tamasese Efi, o ia foi lena e faasino i ai le fanua o Mulinuu ma Sepolataemo.
I se finagalo na faaalia e lē sa avea ma pulenuu o Lufilufi i lea vaitaimi le tofa ia Selelimalelei Malala na ia ta‘ua ai, e tolu vaega autu o le finau a Lufilufi na afua ai le faaiuga ina ia soloa i le aufuefue Tui Atua ma lona aiga.
O le vaega muamua, e lē o fiafia le nuu i le faaiuga a le Faamasinoga lea ua faamatuu atu ai le pule o le suafa Seutaatia i le Tui Atua. O le vaega lona lua, ua mae‘a ona aumai le iuga o le faamasinoga o Fanua ma Suafa, o Lufilufi o loo iai pule o le papa o le Tui Atua, ma le vaega lona tolu, sa tatau i le Tui Atua ona logo Lufilufi, i le fausiaina o lona maota i Mulinuu ma Sepolataemo.
Talu mai le taimi o Aukuso o lena tausaga lea ua savalia nei le ono o tausaga e lei toe afio le Tui Atua i lona aiga i Lufilufi. Peitai o le Aso Faraile na tea nei, 27 o Me 2016, na faatoa toe tulaueleele ai le Nofo i lona maota ma lona aiga ina ua tafa le finagalo o Lufilufi i se tasi o ana fono i le masina o Aperila 2016, e toe faaa‘e le Tui Atua. O upu o le susuga pa‘ū a Lufilufi e pei ona sa avea ai le fofoga o le tofa Selelimalelei Malala e momoli se upu faamaulalo ma se upu faamagalo i le Tui Atua.
Na fetalai le tootoo ma ia faailoa e lē toe fia foi Lufilufi i fatia ua sola ae o le agaga o le loto faamagalo ona o le Maliu o Iesu Keriso ua lagona e le nuu e tatau ona faalelei muamua ma le uso a tagata auā o le finagalo lea o le Atua e maua ai le filemu moni.
Na faatoese Selelimalelei i le Tui Atua i ni sese o Lufilufi i lo latou va, ae ua faamagalo foi e Lufilufi le afioga i le Tui Atua i ni lape o le Nofo.
O le sivaloa a Lufilufi e pei ona tasi i le fetalaiga Selelimalelei Malala e lei faigofie auā o aso faapea e lē fia foi fua le finau a faleupolu tofia o Lufilufi i le manao i le lauga.
O le tofa Manuo Failautusi ma le fetalaiga Feesago Lopi na finau i le lauga, ma o se faatau na faaumiumi ae na faasolomuli se manao o nisi o faleupolu ae tasi i le finagalo e momoli e Selelimalelei Malala le susuga pa‘ū a Lufilufi.
E lei alo tamala le Tui Atua ma lana Masiofo ma o la aiga i tapenaga masani i ie tetele poo ie o le Malo ma tupe aemaise o taumafa ma palapala a malo mo faaaloaloga mo Lufilufi aemaise o le au faigaluega a le Atua sa feagai ma le sauniga lotu na amata ai le faamoemoe.
O molimau na maua ina ua mae‘a le faamoemoe, e leai se isi na foi fua i faaaloaloga na maau i ai le Nofo ma lona aiga. E lē taumatea o se fiafiaga sili foi lea i le afioga i le Ao o le Malo, auā e lē auma lona tulai mai i le tofi taitai o le atunuu, a o teva loto o lona nuu. O le leleiga ua mae‘a ona faia, o se taeao fou e toe fuatai ai le nonofo o Lufilufi ma le Tui Atua i Mulinuu ma Sepolataemo.
