O tala o le vavau o Samoa faapea ona talatuu e na ona faafofoga lava i ai i saunoaga ma fetalaiga a Faleupolu ma Tamalii ae ua na o ni faamatalaga ma faaupuga e aunoa ma ni foliga vaaia o talatuu ma tala o le vavau ua silasila i ai.
Pe afai e silafia e le atunuu nisi o pine o tala o le vavau ma talatuu o Samoa o loo i Falealupo ma Tufutafoe faapea nisi nofoaga o le atunuu, e lē na o le pau ia o vaaiga i tala o Samoa anamua.
O le taumafaiga la ua alo nei i ai le vaega o aoaoga tau i le gagana o tu ma aganuu a Samoa i le Iunivesite Aoao a Samoa, o le faia o sailiiliga e saga faamautu ai pine o ia talatuu ma tala o le vavau.
O le faatinoga o lea galuega o le a agai ai faiaoga ma i latou ua iai le poto aoaoina i suesuega o tala faasolopito e eli nisi o eleele o iai nofoaga o talatuu ma tala o le vavau i le fia maua o ni molimau e faamaonia ai ia talafaasolopito o tu ma aganuu a Samoa.
O le Malo o Amerika ua tu malosi e faatupe lenei galuega tāua i le naunau mai o lea Malo ia maua ni molimau vaaia o nei talatuu o le atunuu mo tupulaga o Samoa i le lumanai. Faaalia e le Amepasa o Amerika mo Samoa le alii o Mark Gilbert e faamautu i Ueligitone i Niu Sila, o se fesoasoani ua talitonu lona Malo o le a tele ni mea tāua ma aogā o le a maua ai.
O ni molimau faitino o le a maua i suesuega o le a faia i nofoaga e 25 i Upolu, o le a teuina i mea faitino faaonapo nei e malu lelei ai auā sailiiliga ma suesuega i tausaga oi luma mo fanau a Samoa ma ē o le a latou faaauau pea suesuega o talafaasolopito o Samoa i ona tala tuu ma tala o le vavau.
Faaalia e le Tapaau poo le pule o le Iunivesite Aoao a Samoa le afioga i le alii Polofesa o Fui Dr Lau Asofou Soo, o le taimi muamua lenei ua agai ai se finagalo o le pulega o le iunivesite i mataupu tau Samoa e faatino suesuega i nofoaga o loo fai mai ai talatuu ma tala o le vavau o le atunuu na afua mai ai nisi o mea tāua na tutupu anamua.
O le faamoemoe autu lava ia ‘oa ma tele ni mau e teu lelei mo aoaoga o mataupu tau Samoa auā fanau a le atunuu i le lumanai.
E $65,000 tupe Amerika ua foai e le Malo o le Iunaite Setete mo lenei galuega tele ma e lua tausaga o le a faagasolo ai suesuega.
