“E manumanu i le naunau o le atunuu e atina‘e le nonu ma tulaga ua aliali mai”
E lē o nofonofo taitai o le Tautua Samoa i le fautuaina pea o le Malo ina ia sailiili lelei faamatalaga o tagata faipisinisi mai fafo e fia faapaaga ma pisinisi i Samoa, a o lei amataina se feagaiga.
Ua mafua le tuualalo a le sui taitai o le Tautua Samoa le afioga i le faipule o Falealupo, Aeau Peniamina, ona o le pueina ma le molia o le alii faipisinisi Saina o Tupailelei Jack Chen, lea o loo faatali se faaiuga a le faamasinoga i Hong Kong i ona moliaga o le aafia i faiga faaalatua ma le faaaogāina o tupe eleelea i ana gaioiga tau pisinisi i Niu Sila.
O loo molia ai ma se tamaitai Saina o May poo Hao Wang lea sa malaga uma i Samoa i se taimi o le tausaga nei e faamautu ni sootaga faapisinisi mo le aveina i maketi i Saina o le sua o le laau o le nonu mai Samoa, faapea nisi o fua tau faatoaga e pei o le koko ma le ‘ava.
O atugaluga o le sui taitai o le Tautua Samoa i le aafia o lea alii faipisinisi i ni tuua‘iga ma moliaga ona ua matauina le lelei o le taumafaiga ma pisinisi ua latou galulue e ave le sua o le nonu i lea atunu mo ni seleni lelei mo le tamaoaiga o Samoa ae peitai ua fesiligia nei pe o le a tua ma ni a, le faamasinoga o Tupailelei.
O le fofoga o alii mo le vaega faaupufai o le Tautua Samoa le tofa Lealailepule Rimoni Aiafi, sa malaga i Saina mo le maketiina o se tasi o oloa mai Samoa le faguvai o le Samoa water.
O lana saunoaga o se atunuu e tele le maketi o loo iai, peitai e alofa i le alii Saina o Tupailelei ma ana taumafaiga, ona ua satia i ni moliaga e lē o manino ma malamalama i ai le toatele o le atunuu ua latou lau atu le nonu ma faatau i le kamupani o le Pure Pasifika i Vaitele.
“E alofa tele i le naunau mai o sia foi tamalii e fesoasoani i le tamaoaiga o le atunuu, ae o se lape lea o le Malo o le lē silasila toto‘a ma sailiili talaaga o ana pisinisi, auā afai nei e afaina ai ana taumafaiga, o le a aafia ai ma o tatou tagata”. Peitai i se pepa o faamatalaga mai le kamupani i Vaitele ua faailoa ai o le a leai se afaina o le ave atu o le sua o le nonu i Saina. Ua malaga ni sui o le kamupani e tapuaia moliaga o Tupailelei i Hong Kong ma o le a iloa ai se isi faamatalaga pe a mae‘a.
O le afea o Samoa e lea tamalii i se taimi o le tausaga nei mo le fia silasila i le atina‘eina o le nonu, na saunoa ai le taitai o le Malo i lona agaga fiafia ua ofi mai se isi taumafaiga faapea mo oloa gaosi a le atunuu e maketi i fafo, peitai sa ia saunoa e ao lava foi i le Malo ona mataitu lelei tulaga o pisinisi a lea tamalii.
