“E lua selau le tupe sa i le teutusi na ave e le sui tauva i le Pulenuu”… Leoleo
O Sameme Faleagafulu ma Tauamo Fea o ni tagata palota o le itumalo o Anoamaa i Sasae, mai le afioaga o Saletele Fagaloa. O Novema o le tausaga e 2010 a o loma le palota tele a le atunuu na faia i le masina o Mati o le tausaga nei 2011, sa faia ai se faatasiga i Falefa sa faalauiloa ai le avea o Alai‘asa Filipo Schwarts Hunt, ma sui tauva.
O le faatasiga lea e pei ona faaalia e leoleo na maua ai se teutusi sa iai se lua selau tala na ave i le Pulenuu o Saletele.
O le seleni lea na tufatufa ma maua ai e Sameme ma Tauamo le ta’i $20 tala, ose selen sa faatosina ai e palota mo Ala’iasa.
Na molia e leoleo i la’ua i moliaga o le taliaina o ni tupe ini auala faaalatua e fesootai ma le palota a le atunuu sa sailia ai tofi o itumalo ile Palemene.
O Aukuso o le tausaga nei na valaauina ai moliaga o le alii ma le tamaitai o Sameme Faleagafulu ma Tauamo Fea, ma sa la ioeina moliaga. O le vaiaso na tea nei na aumai ai le faaiuga a le faamasinoga faaitumalo ia i laua.
O le faasalaga maualuga o loo aiaia o lea solitulafono e pei ona iai se teuteuga i le tulafono o faigapalota, o le sala tupe e lua afe tala poo le nofosala i le falepuipui mo le lua tausaga.
O le isi faasalaga o le $4,000 le sala tupe ma le 4 tausaga i le falepuipui. O loo aiaia foi e mafai ona faasalaina se tagata i faasalaga uma e lua, le sala tupe ma le nofo i le falepuipui.
O le ogaoga o le solitulafono o le talia o ni faamanuiaga i ni auala faapiopio ma faiga faaalatua poo le bribery, na teuteu ai e le Palemene le faasalaga ma faaopoopo lona mamafa. Peitai o le faato‘ā molia lea o Sameme ma Tauamo i se solitulafono ma o le faato‘ā tutulai foi lea i le faamasinoga.
O le finauga faaiu a le itu a leoleo na talosagaina ai le faamasinoga ia aua ne‘i faia se faasalaga faafalepuipui mo i laua ona o itu lelei e pei o le la ioeina o le moliaga, ma le faato‘ā molia lea i se solitulafono pe a fua i le matua o o la soifua ta‘i 51 tausaga.
Na talia e le tamaitai faamasino o Mata Tuatagaloa Keli le folasaga a leoleo ma faia ai le faasalaga tupe e ta‘i selau tala e totogi e le tagata e toatasi.
Peitai e 24 itula na aiaia e tatau ona totogi ai lea sala tupe, poo le falepuipui mo le 2 masina.
Ua faailoa mai e se ofisa sinia o le ofisa o le lesitala o faamasinoga ua mae‘a ona totogi le sala tupe a Sameme ma Tauamo.
Ua ave i ai le lapataiga a le faamasinoga e lē tatau ona toe molia atu i se solitulafono e fesootai ma faiga faaalatua.
O le isi taimi e molia atu ai ae faamaonia, o le falepuipui le faasalaga.
