Na matuai faateia le faalogo ma le vaavaai a le toatele ina ua momoli mai i tala o le televise se ripoti i se faalavelave i mataupu faaleaiga ua aafia ai le alii lakapi o Julian Savea. Sa faatoese aloaia i luga o le televise le alii o Julian Savea, e tusa ai ma le mea ua tupu i lona aiga. Na faatoese foi le alii i lana paaga, le tamaitai o Dawn ma le lautele e tusa ai ma le mea ua tupu.
O le taimi nei o loo tausia le alii ia Savea e lona tina mo fautuaga i lana tama, a o Dawn o loo i le fale o Savea. I le talutalu fou o le tulai mai o lenei mataupu o loo sooupu ai le tina o Savea ia Lina i taualumaga uma o lenei mataupu.
O loo faaalia le agaga faatoese o le alii ia Savea e tusa ai o le faalavelave, e lē o natia foi le mea na tupu ma o se tasi lea o vaega tāua tele ina ua tulai mai o lenei faalavelave, ina ua maua le avanoa e tulai ai Julian Savea i luma o le televise ma faatoese ia i latou uma o loo aafia ai e tusa ai o le mea ua tupu.
Ua faatino foi ma faaleo le tulaga e ono fesoasoani ai le Iuni Lakapi i auala uma e lelei toe talafeagai ai e tusa o se fesoasoani atili e faaleleia ai le va e pei ona aafia e faaosoosoga a le fili sauā. Pau a le vaega manino o lea ua foliga mai i uluai taimi o lenei mataupu, o le vave ona tulai mai o Julian Savea e faafetaia‘i le autusitala ma televise ina ia vave ai ona tau fofo le mataupu i sona nofoa lelei, faatasi ai ma le lē nofoai ai o le tina ia Lina ina ia faatino loa le alofa faatina i lea taimi.
E ui ina sa faanoanoa le Iuni Lakapi ina ua logotala i le faalavelave, ae sa saili fesoasoani ina ia mautinoa o loo fai se galuega lelei mo alii lakapi o loo talavou olaga, ina ia manuia lelei i le lumanai, ma e lē o se taimi muamua foi lea ua tulai mai ai i totonu o faalagamaea o le lakapi lenei faafitauli.
O le aso la ananafi na tulai ai le alii ia Savea i le faamasinoga e tali i ona moliaga, ma ua toe tatalaina ai loa i tua mo le isi avanoa e tulai ai loa. Ua leai se ese mai o lenei alii mai le toatele o tama taaalo faapolofesa i aafiaga i mataupu tau ulugalii talavou e moomia ai fesoasoani mo latou, a o lei oo atu i le tele o le gaogaosa ma ta‘uvalea ai i faafitauli faatauvaa.
Ua toe taatia atu nei i tua le mataupu e tālia ai le toe tulai i le faamasinoga, manatu foi e lē ese mai lenei mataupu i le toatele o tatou, ae ia avea pea mea e tulai mai ma fagufagu mo tatou uma ina ia mataala i atimi o faaosoosoga mai le fili. Tatou tālia lenei mataupu ina ia taunuu i sona taunuuga lelei mo le nofo fealofani lelei ai o tatou uma, ma le savaliga faaauau o loo faia pea.
