Tapili e Toga le Toa Samoa

Ua loa ona faalauiloa le taaloga a le Toa Samoa ma Toga, ma o le po o le Aso Faraile 20 Aperila na fetoai ai atunuu e lua i Penrith lea na matuā manumalo mataina ai Toga i ‘ai e 36 -4 a le Toa Samoa.
O le malosiaga o Toga na vaaia lea i le latou laina i luma lea na matuā sasao ai Fuifui Moimoi, Sam Moa ma Sika Manu. E toatele sui e lei taaalo ma e talitonu le au tapuai a le Toa e malosi nei Samoa i le vaitau o le Ipu o le lalolagi.
Na vaaia le meia o nisi tama fou o le Toa Samoa ina ua misi le tele o pue ma pa‘ū le polo. E lē gata i lea na vaovaogata le osofaiga a Toga i le vaai mai i le tele o measese a le tatou ‘au.
Na uluai sikoa le numera ono ia Samisoni Langi ma sili ai Toga e 4-0 sosoo ai ma le sikoa a Siuatoga Likiliki lea na sikoa faalua mo ‘ai e 10-0. O le fetu pupula ia Daniel Vidot le uigi lea na sikoa mo Samoa mo ‘ai e 10-4 ma gata ai loa taumafaiga a le Toa.
O le ‘afa faaiu na toe malosi ai le osofai a Toga ma taufai sikoa faalua ai le uigi a Toga ia Mahe Fonua ma le sikoa lona lua a Samisoni Langi. Na matuā fesasia‘i solo le fulupeki fou a le Toa ia Alex Wright lea e taalo ia Cronulla Sharks.
Na matuā maka lelei e Toga le centre malosi ia Junior Sau i le taitoatolu o Toga e pueina i taimi uma e maua ai le polo. E faaiu le taaloga toe minute fasefululima sekone le taimi o totoe i luga o le uati, ae peitai ua lē mafai ona taofiofi le aumaimoa a Toga na laga mai i totonu o le malae.
Ua tapena atu nei le Toa Samoa e faatalitali le Ipu o le lalolagi ia Oketopa atonu e toe fetaui ai ma Toga pe a sao uma i le valu pito i luga. E talitonu le toatele, e telē se suiga o le faaopoopo e le alii faiaoga o Samoa ia Steve Price i le ‘au mo lea tauvaga.