O le susuga Eliota Fuimaono Sapolu ma le afioga Galumalemana George Stowers, na maua le avanoa e saunoa ai i le faalauiloa a le vaega o tama talavou o le Toomaga mo ē Puapuagatia i le polokalame o le 16 aso o le tetee atu i sauaga e aafia ai tina ma tamaitai ma fanauiti i le lalolagi e pei ona faatāua foi i Samoa i lenei masina faaiu o le tausaga.
Na agiga i le finagalo o Eliota le tatau i le Malo ona tuu atu le lagolago malosi i polokalame faapea ona o le naunautaiga e titina ma tafiesea soo se sauaga.
O lana faamatalaga a o faafofoga nisi o le atunuu sa auai i le faalauiloa na faia i le nofoaga o le NPF Plaza i Apia, e lē o iai se lagolago malosi a le Malo i le tetee atu i sauaga o loo afaina ai lagona, o tino ma le mafaufau o tina ma tamaitai ma fanauiti. O lana lu‘i faatauanau i le Malo o Samoa ua tatau nei loa ona ave le faamuamua i lenei mataupu ona ua lē utuva pea le lipotia o tina ma tamaitai ma fanau ua sauaina. O le folasaga a le afioga Galumalemana George Stowers, na ia ta‘ua ai o se tasi lava lenei o faafitauli ogaoga ua aliali mai pea e lē gata o Samoa a o isi foi atunuu o le lalolagi, ma e lē na o Samoa o loo faia ai polokalame e faalauiloa atu ai e lē o se mea lelei le sauaina o tina ma tamaitai ma fanauiti.
E ui e lei maua atu e le susuga Mahonri Schwalger le polokalame a le Toomaga mo ē Puapuagatia na sausaunoa ai nisi o tama lakapi o le Manu Samoa, ae o lona naunau atu e auai o le pine faamau lea o lona foi lagolagoina o polokalame o le 16 aso e tetee atu ai i sauaga.
O se tasi o tamā sa molia i le faamasinoga i lona sauaina o lona toalua ae sa auai i le polokalame a le Toomaga e faatonutonu ai le ita, na faia lana tautinoga ma ia faailoa ua na lagona e lē o se mea tatau ma talafeagai le faia o soo se sauaga i tina ma fanau. O lana faafetai lea i le polokalame a le Toomaga ua mafai ona faatonutonu ai lona loto ita ma ua mafai ona tetee atu i sauaga.
O le vaiaso lenei ua latalata ina faamae‘a ai polokalame o le 16 aso o le tetee atu i le sauaina o tina ma tamaitai ma fanau i Samoa.
O le naunautaiga o le Toomaga ma le Matagaluega o Tina ma Tamaitai atinae o nuu ma aga fesootai, faapea le UNPD se tasi o lala o Malo Aufaatasi, ia avea lenei faalauiloa i tausaga uma e fesoasoani e fai ma faamanatu i tagata le tetee atu i sauaga.
O le sauaga pito matuia talu ai nei o se tina o le nuu o Leauvaa uta na maliu ina ua faaoo i ai e lona toalua ni sauaga ogaoga ma matuia.
O loo loma le faamasinoga o lea tamā o loo molia e leoleo i le fasioti tagata faamoemoeina.
