E ese mai le vaega ua faatulaga ma‘oti mo le tapuaiga a le ‘au lakapi a le atunuu, le Manu Samoa Supporters, a o faagasolo taaloga a le Manu i le Taamilosaga Lakapi o le Ipu o le Lalolagi i le masina o Oketopa, ae ua faamaonia mai foi le sauni o le aai o Grey Lynn, e tuuina mai le latou lagolago malosi ma lo tapuaia o le ‘au a Samoa i lea taimi.
O se polokalame na taulagalaga i ai le asosi a le au faipisinisi i Aukilani, o so latou sao foi lea i le tapenaina o lenei faamoemoe o le atunuu i ana taliga malo i le taamilosaga o le lakapi.
E tusa ma le 34 pitonuu i totonu o Aukilani o loo aofia i lenei polokalame (Adopt-a-second-team programme).
O le taulaiga na mafua ai lenei taulagalaga o finagalo, ina ia atili unaia ai le avea o Niu Sila, aemaise i Aukilani nei, ma atunuu e talimalo lelei, i atunuu uma e 19 o le a auai mai a latou ‘au lakapi i lenei taamilosaga, ina ia lē gata e tapuaia le latou ‘au le All Blacks, ae o le a mautinoa foi o loo lagolago atu ma taputapuai mo nai isi ‘au a o taaalo ai i laufanua ese.
O lea la na siilima ai le vaega uma o le au faipisinisi i Grey Lynn, e aofia uma ai ma West Lynn ma Westmere, o latou na o le a sauni e fesoasoani i le tapuaiga a le aumaimoa a Samoa mo lana ‘au lakapi.
Ta‘ua i le pepa o faamatalaga na tuuina mai, se saunoaga a se tasi o sui o le komiti laititi a le asosi o le au faipisinisi a Grey Lynn, o Soala Wilson e faapea, ‘o se fiafiaga tele mo latou le filifilia o Samoa e avea ma a latou ‘au lona lua o le a tapuaia, auā ua talafeagai lelei pe a fua atu, ua leva ona mautu fesootaiga a tagata Samoa ma lea foi pitonuu o Aukilani, ma e toatele aiga Samoa o loo alaala i lea pitonuu’.
O nisi o fuafuaga o loo agai i ai lenei asosi, o le a teuteuina taulaga faatau uma i lena vaiaai i lanu e masani ma fiafia ai tagata Samoa, i le taimi a o faagasolo le taamilosaga lakapi o le Ipu a le Lalolagi.
E lē gata i lea, o le a iai foi nisi poloketi o loo fuafua le au faipisinisi iinā e fai, o ni poloketi e iai ni sootaga ma feleiva o Samoa. O se tasi o faatumutumuga o na poloketi, o loo fuafuaina se savaliga o le a taitaia e le susuga i le faafeagaiga, o se tasi na soifua a‘e lona soifuaga atoa i Grey Lynn, le susuga Revrend Mua Strickson-Pua.
I se taimi mulimuli, o le a toe logologo atili mai ai nisi fuafuaga o loo faatulaga e lenei lava vaega, le GLBA a o galulue faatasi ai ma isi asosi ma faalapotopotoga a le komiuniti, auā lava le lagolagoina atili o le tapuaiga o le ‘au lakapi a Samoa, a o alo atu mo ana taaloga i le taamilosaga o le ipu a le lalolagi i le faagatama o le Lakapi.
