Talofa lava i le suafa o Keriso lo tatou Alii. Malo lava le soifua laulelei i lenei aso.
E afua mai mauga le manuia o le Nuu. O le nuu e pei ona masani ai le soifua o Samoa ua uma ona tuu matamaga mea uma.
E afua mai i ona faalupega, i paia ma mamalu sautuafafafa faaleafioaga e oo lava i ona pulega ma tulaga tofi seia oo i le faatinoga o galuega taitasi.
O ā mea e fai i totonu o se afioaga e faasiusiu mata uma lava mea i le pulega mamalu a alii ma faipule.
E ui foi lava o i latou nei e faia upu o le nuu ma tonu mo le manuia o se afioaga, ae e iai foi le silasila maualuga i susuga i faafeagaiga.
Ua mafua ona ou ta‘ua lea tulaga ona o Samoa o le atunuu e talitonu i le lelei o taitai ma le taitaiga. E iai le faamuamua, e iai le ava i ē ua mau tulaga tofi.
O le mafuaaga lena ou te talitonu ai lava i le tāua i soo se tasi e seei mai i se tulaga tofi faataitai ona aua ne‘i mamasagia ia te ia le matafaioi ua tuuina atu ia te ia.
O le tofi ina ia manuia ai le lautele ae lē faapito ai manū ia Tasi. Afai o oe o se tasi ua faaee atu i ai se tulaga tofi faataitai, ia e manatua le tulaga lenei: ‘O oe e afua mai ai manuia o tagata o i lalo o lau taitaiga.’
O se luitau lenei e feagai pea ma a‘u i aso uma.
Ou te fesiligia foi lo‘u lava tagata pe faapefea ona avea a‘u o se vaitafe e tafe atu ai faamanuiaga i isi.
E fia talatalanoa pea i taitai faalelotu auā e pei o le vaega tele lea o loo faaautū i ai lenei tusitusiga.
Afai o oe o le taitai i totonu o le ekalesia, ia e manatua o lou tofi, e lē o se faaaloalo ua tuuina atu ia te oe e tagata lotu ae o se matafaioi.
E lē o se mea e iloa ai oe, ae o se galuega e te faia ia iloa ai isi. E lē o se mea e manuia ai oe, ae mo le manuia o isi.
O nisi nei o matafaioi faataitai e tāua foi ina ia manuia isi poo le ekalesia:
1. O le taitai e tatau ona taulamua i mea uma
O le uiga lena o le upu taitai. O le ta‘i o le tagata muamua. A alu se sopoaga ona faapea lea o se isi “Sau oe e ta‘i le ala e te iloa”. O i latou i tua o lē o loo ta‘ia le ala e mulimuli mai poo fea lava e alu i ai le solo. Silasila ane i vaega nei e tatau ona taulamua ai le taitai:
Le Foai:
A lē foai taitai o se ekalesia, e faapea foi ona lē foai tagata. O le faifeau i lo‘u lava talitonuga e tatau ona tele lana foai. E lē o se tauvaga. Ae ia solomua ia te ia ona faataitai i tagata le tāua o le ola foai i le Atua. O isi taitai ma ē mautofi i totonu o le ekalesia e tatau foi ona faapea.
E toe faamanatu atu, e lē o se tauvaga, ae ia avea outou taitai o se faataitaiga i lea vaega tāua. E lē faapea o le lauina mai o outou suafa, ae lē mafai ona lilo se mea lelei.
Le Fuafuaina ma le Faaaogāina o Tupe:
O se tasi lea o vaega e tāua tele mo le manuia o le galuega a le Atua, o le silafia lelei e taitai ona fuafuaina ma faaaogāina tatau le seleni a le Ekalesia.
Manatua foi o le vaega lenei e sili ona faamalepe ekalesia. E ao la ona mataala i ai taitai.
Le Paketi:
E tatau i soo se ekalesia ona iai se tala faatatau o le tupe poo le paketi i tausaga taitasi. Ia malamalama uma i ai taitai, atoa ma le faifeau. Ia tele le leo o le faifeau i le paketi poo le tala faatatau o le tupe.
O ia o le taitai ma le leoleo mamoe. E iai vaega o le galuega e silafia e le faifeau e manuia faaleagaga ai le ekalesia e ao ona mataala i ai i latou o taitai, ne‘i te‘i ua taofia nei faamanuiaga ona o le mata‘u i le tupe.
Fuafua mamao. E tele vaega tāua o le tala faatatau o le tupe, ae ou te manatu ia silasila toto‘a i le itu lenei:
• E fia se vaega tupe o fuafua mo le faaevageliaina, poo le talaiina o le tala lelei.
• E fia se vaega tupe o fuafuaina mo le atina‘eina o tupulaga ina ia avea ma taitai manuia mo le lumanai o le ekalesia.
• E fia se vaega tupe o fuafua mo le a‘otauina o tagata i le Upu a le Atua.
• E fia se vaega tupe o faaagaga e fesoasoani ai i tagata mafatia ma ē matitiva i totonu o le tou ekalesia ma fafo atu.
Manatua foi o le ekalesia ma lana matafaioi o le faatalaleleiina o le lalolagi. Afai e lē o iai vaega nei i totonu o le tala o le tupe, ou te talitonu o loo faaalu sese le tupe a le Atua. O loo alu i le tele o isi mea ae tuu le mea uliuli o le mata o le ekalesia, o le tala lelei ina ia faaolaina agaga.
Ia manuia taitai uma o ekalesia Kerisiano.
Lui Ponifasio
Email:luiponifasio@gmail.com
