O taga eseese na faamalieina ai le maimoaga ma le silasila a le valaaulia ma le aumaimoa na auai atu a lagolagoina ma molimauina le faafiafiaga faakoneseti na tapenaina ma faataunuuina e le vasega a le Samoan Bilingual i totonu o le aoga a Robertson Road i Magele lea na faataunuuina i le afiafi o le Aso Lulu i le maota o le aoga a le Martin Hautus i Onehunga.
Na alu le malaga faaleaoaoga alo ma fanau o le vasega Samoan Bilingual a le aoga lea i Samoa i le amataga o le tausaga nei ma na api ma faamautu i le malae o le EFKS i Leauvaa auā le latou soo ma le aoga tulagalua a Levi i Saleimoa.
O lea mafutaga sa maitauina ai e fanau malaga atu le mālie foi o tu ma aga a nai alo ma fanau i Samoa, ma sa faateia ai foi la ma fou ai i le latou vaai le faaaogāina e tamaiti aoga o nisi mea e lē o ni meataalo talafegai e pei o atigifagu pa‘u (plastics), o seevae ma nisi foi mea ma faatinoina ai a latou taaloga.
O foliga vaaia la nei na o mai ai lava le fanau mai Samoa ma lo latou lagona e fia oo atu sa latou fesoasoani e ala i le fia foai atu o ni meataalo talafeagai lelei e faaaogāina e nai o latou uso ma tuafāfine i Samoa mo a latou taaloga.
Lea la na tapenaina ai lo latou faamoemoe e pei ona sa faataunuuina i le afiafi o le Aso Lulu i se latou koneseti e saili ai se seleni e faatauina ai ni meataalo e foaiina atu mo tamaiti o le aoga tulagalua a Levi i Saleimoa. E toatele foi sa o latou lagolagoina lenei faamoemoe tāua e fai ma sao e molimoli ai alofaaga o nai fanau e tusa ma lo latou lagona ma la latou vaai.
Na mafai foi ona faamalosia le tapenga o le koneseti ona o le lagolago malosi a le susuga ia Lui Tusani (sponsor) aemaise o le alii puleaoga le susuga Wayne ma le aiga faiaoga faapea foi le matafaioi tauave a mātua na faatinoina i lea po, ma na latou tauaaoina ai se seleni e $1,200.00.
Na mae‘a faafiafiaga ma le faamoemoe i lea po ona saunoa lea o le taitaifono o le mafutaga a fanau o le Samoan Bilingual le susuga ia Tausaga Faga‘io, na momoli mai ai le loto fiafia ma le agaga faafetai i le paia ma le mamalu o le auvalaaulia i tagata uma lava na mafai ona maua atu ai le fesoasoani ona o le aao mafola ma le agalelei e tusa ma le tupe ua latou maua o le a faaaogāina e faatau ai meataalo ma faaoo atu i le aoga a Levi Primary School i Samoa.
