O le Aso Tofi na tea nei na taunuu mai ai i Samoa le alii fusu o Leti Leti mai Amerika ma ua koleni faatasi ai nei ma alo o Samoa o loo fusu i Niu Sila ia Warren Fuiava, Vaitele Soi, Pele Faumui ma Oli Filimaua.
O se fuafuaga na faaalia ai le agaga fiafia o se tasi o tino matua o fusuaga a Samoa, le tofa ia Leituala Tapusoa Fifita, le Peresitene o le Asosi Fusu o le Tumua ma Pule.
Faaalia e Tapusoa, “O se avanoa tāua le malaga mai ma koleni i Samoa o i latou nei auā le faamalosia ma le faaolaolaina o fusuaga a Samoa.”
Saunoa Leituala i le mae‘a ai o le mafutaga e lua aso i le Aso Tofi ma le Aso Faraile ua tuanai, lea na nonofo ma koleni faatasi ai tama fusu faapolofesa e lua sefulu ma le lua mo le tapenaina o le fusuaga tele o le Sisiga Fua o le tausaga nei.
Faamaonia mai e Pa‘u Fereti Puni o le pulega a le Event Polynesia le see mai i Samoa o le polokalame High Perfomance Academy (HPA) sa faatinoina i Niu Sila.
Fetalai Pa‘u, “O le tausaga na tea nei na amata ai le polokalame i Niu Sila ma maua ai avanoa o alii fusu faapolofesa nei e toalima mai Samoa.
Faato‘ā tasi le tausaga ae ua faamanuiaina uma alo nei o Samoa e pei ona iai Leti i lana konekarate i Amerika, a o le isi toafā ua konekarate nei mo taaloga i Niu Sila ma isi vaega o le lalolagi.”
O le mafutaga poo le ‘training camp’ i le vaiaso na tea nei o se avanoa tāaua lea ua maua ai e tama fusu uma faapolofesa i Samoa le malamalamaga i tulaga tau le pisinisi o fusuaga faapolofesa ma faamalositino e patino mo tama fusu.
O le fetalaiga ia Pa‘u sa faafoeina a‘oa‘oga poo ‘seminar’ lea sa aofia ai le faamalamalamaina o le sootaga o fusuaga amateur ma fusuaga faapolofesa.
O nisi o vaega tāua e aofia ai le manino i le matafaioi a le kamupani o le Event Polynesia ua fā nei tausaga o taulamua i le atinaeaina o tama fusu faapolofesa i Samoa.
Faaalia e Pa‘u, “E fā vaega o loo faafoeina e le Event Polynesia mai le lima o vaega o fusuaga.
O le faia o konekarate a tama fusu, o le tapenaina o a‘oa‘oga ma koleniga, o le sailia o taaloga mo tama fusu ma le tulaga tau ‘promoter’ poo le faia o fusuaga e maua ai taaloga a tama fusu.
Pau le vaega e lē aofia i matafaioi a le Event Polynesia o le tulaga lea tau ‘sanctioning body’ poo le “asosi e faafoeina fusuaga.”
O fusuaga amateur i Samoa o loo nafa lea ma le Samoa Amateur Boxing Association, a o le South Pacific Boxing Incorporated o loo faafoeina fusuaga faapolofesa a Samoa ma le Pasefika.
O le tofa ia Leapai Richard Brown o se alo iloga o Samoa i taaloga lakapi a Amerika ua mālōlō ma alaala i Samoa o loo avea ma faauluuluga o koleniga a le Event Polyneisa i lana polokalame High Performance Academy (HPA).
E tele tausaga o nafa Leapai ma nisi o koleniga a ‘au lakapi a Samoa faapea foi ma le ‘au lakapi liki a le atunuu le Toa Samoa.
Faaalia e le alii fusu heavyweight o Sipaia Fouvale mai Lalovaea ma Siumu, “O le aogā tele o le ‘camp’ ua ou iloa ai nisi o metotia e faaaogā ai le ogalaau, maa lapopoa ma le tauupega e fai ai koleniga mo matou o loo nonofo i nuu i tua faapea Savaii e lē o maua ai ni fale faamalositino (gym).”
Faaalia e le alii o Carl Brighouse o Sinamoga sa auai, le tāua o le malamalamaga ua ia maua i avanoa i fusuaga faapolofesa pe a mae‘a fusuaga ‘amateur’.
E iai le fuafuaga a le Event Polynesia e faatolu ona faia a‘oa‘oga nei (seminar) mo tama fusu i le tausaga. O loo iai foi le faamoemoe mo se a‘oa‘oga mo faiaoga ma pulega a kalapu fusu i se taimi o lenei tausaga.
Faaalia e Pa‘u, “E telē se suiga e mafai ona oo i ai fusuaga a Samoa i le faia o a‘oa‘oga nei mo le malamalama o tagata uma i tulaga tau le faagaioiga o fusuaga.”
O se taimi o le vaiaso nei o le a faalauiloaina ai paga o le fusuaga tele o le Sisiga Fua lea e ono taalo ai Leti Leti i Samoa a o lei toe foi i Amerika.
