O se mea e maitauina i le soifua o lenei auauna, e le o se tagata e ola tamamau i se aoaoga e tasi peitai e iai le naunautaiga e sailiili. Atonu o lea le manatu o loo faapea ai le upu, ‘O le uta a le poto e fetala’i”.
Na manatu ai Ioane Uesele ina ia faalauteleina lona silafia i le afioga a le Atua atoa ai ma lona sailiili pea ma faamalosia lona ola faaleagaga.
O le tausaga e 1738 na malaga ai i le atunuu o Siamani i le aai o Herrnhut. O i o loo iai le ofisa tutotonu o le talitonuga Moravian.
Ao iai i Siamani, na faapea ona maua se fesootaiga a Ioane Uesele ma le Sosaiete e taua o le Fetter Lane Society.
Sa faapea foi ona maua e Ioane se fesootaiga ma nisi o faalapotopotoga Kerisiano. Na afua foi i lea vaitau ona tusi ma lomia ia pese lotu e Ioane Uesele. Peitai e lei iai lava se falesa e faatagaina o ia e lauga ai.
O se tasi o uo mamae a Ioane Uesele e suafa ia George Whitefields, poo Siaosi Uitifili, na lauga i se tasi o nofoaga faitele na mafua ai ona maua avanoa a Ioane Uesele e lauga ai foi. O le tausaga e 1739, na amata ai ona lauga Ioane Uesele i tagata o loo galulue i le eliina o le koala ma le minerale.
O lea feiloaiga na mafua ai foi ona laasia e Ioane Usele se tasi o vaega i lona ola faaleagaga aemaise o le folafolaina o le Afioga a le Atua i le lalolagi.
E ui e le o se mea na faigofie ia Ioane Uesele i le amataga, peitai na iloa nei e Ioane Uesele le taua o le lauga i fafo o le falesa.
Na taofi maumaututu nei e Ioane e faapea, afai ae le o mai tagata i le lotu, o le a faapea ona ou alu e ave iai le lotu.
Na avea lea malamalamaaga o Ioane i le taua o le folafolaina o le Afioga a le Atua e le faatapulaaina. O le tausaga lava lea na suia ai le mafaufau a Ioane ma le toe auai atu o ia i le faalapotopotoga o le Moravia i Lonetona.
Ae ua ia faatuina se tasi faalapotopotoga ma ua faaigoaina o le Sosaiete Metotisi Egelani.
Na amata nei ona faasaga atu Ioane i le folafola po le laugaina o le afioga a le Atua i soo se nofoaga e maua ai le avanoa.
O Ioane o se tagata e fiafia tele e aoaoina le afioga a le Atua peitai sa iai lava taimi e fesiligia ai e tagata lana mataupu silisili ona sa iai vaega o lona talitonuga sa faapea ona le taliaina e nisi aemaise o lana aoaoga i le ta’u amiotonuina o le tagata faapea foi le talitonuga i le faamautuina o le faaolataga.
E foliga mai e lei maua lava se mautonu o Ioane Uesele i nei mataupu silisili ma lana aoaoga.
Ua tele avanoa e lauga ai Ioane Uesele i fafo atu o le falesa. Sa faigata i lona lagona faatagata lotu i le ekalesia Egelani lenei ituaiga o le folafolaina o le Afioga a le Atua.
O se tasi aso na lauga ai Ioane Uesele mai le fanua maliu ma avea ai le maa faamanatu ma ana pulelaa.
Ua amata ona inosia nei e le tele o tagata Ioane Uesele ma lana talitonuga poo lana aoaoga fou foi e pei nei ona faatuina ai le Metotisi.
O se tasi o talitonuga taatele ua iai nei, o Ioane Uesele ua faatuina lana ekalesia fou. Sa matua le taliaina e tagata Egelani lea manatu. Na avea lea ma faafefefe i taitai o Ekalesia aemaise lava le ekalesia Egelani.
Ua amata nei ona faalogoina i totonu o falesa aoaoga ma lauga a faifeau e faaleagaina ai ma ulagia ai Ioane Uesele ma le talaiga.
Na lauina e i latou Ioane Uesele o se tagata o loo ia faasese i tagata, o se o loo faatupu le feitaga’i. O nisi ua manatu o se tasi nei o auala a le Ekalesia Katoliko o loo taumafai ai ina ia mafai ona toe liliu atu le Ekalesia Egelani i lalo o le lotu Pope.
E lei faavaivai ai Ioane Uesele ma i latou ua mulimuli nei ia te ia ma lana tala’iga. Ua atili ai ona manatu e faasalalauina le tala lelei. Ua liliu ane nei Ioane i le fafagaina o tagata fia aai ma fesoasoani i tagata mafatia.
Sa faapea foi ona faitioina e nisi nei auala e faapea o se taumafaiga a Ioane Uesele e faatosina tagata.
O se tasi o vaega o le aoaoina o le afioga a le Atua i totonu o le falesa, e lei fiafia iai Ioane o le taimi lea e faia ai filifiliga ina ia mafai ona salamo tagata ina ua maea le luitauina i le Upu.
E manatu Ioane Uesele e taua tele le tuuina atu i le tagata o le taimi e filifili ai ina ia salamo peitai sa lei mafai ona tupu lea tulaga, ona e oo lava i le aufaigaluega sa le mafai foi e i latou ona o le ola pepelo.
Na talitonu e Ioane o ia na valaauina faapitoa e le Atua ina ia toe faaupegaina ma faaolaolaina le ekalesia a le Atua. Poo le a lava le tele o faafitauli ma faitioga a tagata e le foi ai lona valaauina.
O se tasi o vaega o lenei valaauina o lona faaaupegaina lea o failauga ma auina atu e folafola le tala lelei. Sa ia faaaogaina alii ma tamaitai. O se faiga fou e lei faia muamua, aemaise o se faiga sa faatauaina ai tamaitai i le galuega a le Atua.
O failauga nei e lei mafai e le Ekalesia Ekelani ona faaaoga pe faauuina mo le galuega folafola.
E manatu le toatele o le vaega tonu lea ma mafua ai ona vave salalau le tala lelei ma le aoaoga FaaMetotisi.
Ua tupu le galuega ma ua amata ona moomia fale mo tapuaiga.
Na amata ona maua fale lotu i le aai o Bristol, ma Lonetona ma oo atu ai i isi vaega.
Soo se galuega lava ua amata ona lelei e faapea foi ona iai ona faafitauli. Na taumafai nisi o sui e osofaia le filemu.
Na faia e Ioane Uesele se faiga ina taofiofi ai le filemu o le ekalesia. Ua faia ia pepa faapitoa mo sui auai o le Metotisi, e faapea ona faaaogaina. O nei pepa mo sui auai e tai tolu masina ma faafouina.
Ua tupu le galuega. E oo mai i le tausaga 1942. Ua tele auala eseese ua faataunuuina e Ioane Uesele aua le faatupuina o le galuega. Na maofa le toatele o tagata i le tele o metotia a Ioane e faatautaia ai le galuega. Na amata mai lea i le taimi na ia tusia ai i lona aao ia tusi faamaonia o sui auai o le Metotisi. Sa faapea foi se isi metotia e pei o le faia o
vasega taitasi e aoaoina ai le Tusi Paia.
Ina ua tupu ma tele le galuega sa faapea foi ona tele mea e toe faaleleia. Na sosoo le tusia o suafa i le faia o vasega. Ina ua toatele vasega sa faapea ona faaaogaina e Ioane Uesele se isi auala e asiasi ai tagata uma lava taua nei o tagata Metotisi e vaega eseese e tai tolu masina ma faatinoina.
Na avea nei asiasiga ma auala na suia ai i le Koneferenisi. Na le mafai e Ioane Uesele ona toe maua le avanoa e fesootai ai ma tagata uma. Ona faapea lea ona ia tusia se tusi o loo iai tulafono e tuuufaatasi ai ia le ekalesia Metotisi aoao.
