E Tauaso le Alofa (18)

E faatalofa atu i le mamalu o le tatou atunuu i lenei foi vaiaso. Malo le soifua manuia ma le lagi e mama.
E manatu o loo tumau pea le maualuga o le tausiga alofa a lo tatou Atua i lo outou soifua ma so matou ola, ia viia ai o Ia. Ae alo maia o lea foi o le a toe sosoo atu le tatou Fagogo i lenei vaiaso, ma le faamoemoe o loo faapea ona fiafia lava le mamalu o le aufaitau i vaega taitasi o loo lomia i lea vaiaso ma lea vaiaso.
Na gata mai le tatou tala i le taimi lea ua paka ai le taavale a Tala ma le tamaitai o Maumea i le paolo o loo faamalumalu mai i laau ia e tutu i Mulinuu, i luma atu lava o tia o loo faapea ona tofafa ai tupu o le atunuu. Ia manatua foi o le nofoaga lea e ese ma le mālū aua e puaina mai lona sau i le taaviliga o auma fafati o le Penisula. O le ala foi lea e tele ina lolofi i ai evaga aua o se nofoaga manaia tele. O le isi foi itu, e mamao mai le taulaga i le vaaiga o mata.
O se nofoaga e tumu i faaosoosoga o tuinanauga le faamalieina, ona e pei o le natura lea ua siomia ai lenei foi vaipanoa o le tausiusiuga o le taulaga i Apia, ma e seasea asa se faiva e fagogota ai i lenei foi ogaeleele. Pe o le a foi le fia malo o le teine e tau i le lagi, e liusuavaia lava ona lagona pe a oo ina taia i le sau mālū o laufanua o le tolotolo.
Na tape le taavale a le tama ona Tala ona tago lea ua vili faaafa i lalo le faamalama ina ia sau se savili ma se ea fou i totonu sei faamalu i o la tino, ona toe aapa ane lea ua tatala le tagapepa ma laulau ane le meaai. O le teine o Maumea e fai uma lava nei gaioiga a le alii o Tala ae o loo ia tulimatai pea mea uma o loo ia migoi agai i ai.
E oo lava i le vaevaeina o le leo o le alii i le faiga o ana faamatalaga ua pei lava o le selo i le mafaufau o le teine le faauigaina o siuleo ma soofuaiupu o loo gagana ane ai le taulealea.
“Ia o lau taumafataga lea Mea, e lelei lava le papaaveloa manu o lea e vevela aua e le lelei foi pe a maalili”. Na tago ane le teine i lana meaai ona avau loa lea ma le la tautega o le aoauli. E ai fua le teine ae o loo iite lava ona tino e iai se mataupu o loo fia talanoa atu ai le alii o le Tala. E faapena foi le mafaufau o Tala latou ia, e fai fua lava le la meaai ae o le taimi lea o loo tau sema sona avanoa aua lona vaa o loo fia faaofi i le ava.
“Mea, ua ese lava o ta faalogona o loo iai i le taimi nei. Ae ou te le manao foi e fa‘i moto se manatu ua afuafua ma se lagona ua totogo i nei tei ua maimau le ola ae lei fua mai”.
“Se le tama foi lea, aisea foi ua e saunoa ai faapena pei oe o se tagata vaai mamao, a o lea lava ta te nofo atu i ou autafa ma fai le ta meaai”. “Leai, vaai oe, i nei tei ua e faapea o ni tala ula ia ou te fai atu.
Talu mai lava le aso na e talanoa mai ai ia te au e uiga i le measese na semanu ou te faia, ua sui ai lava ma lou tagata. O mafaufauga lelei sa mamao ma au ua fetaomi mai. O manatu mananaia ma le fuafua mamao aua se manuia, ua pei o le a le luluti mai ma ua ou lagona ai lava le fiafia.”
“O le ala foi lea na ou manao ai lava ina ia maua se taimi ta te talanoa ai faapenei na o taua i se nofoaga paganoa e pei o lenei ua ta iai. Aua foi e lelei lava le sasaa atu ae o loo talisapaia mai se fanoga, ae leaga le masua atu, ae ua pei lava o le penina ua maimau i uli”. “Tala, faafetai i le alofa ma le agalelei o le Atua pe afai ae ua iai se aoga o lenei tagata faatauvaa ia te oe”. E lei uma atu le upu lea a le teine ae tago mai le tama ua oomi lona lima ona ia fai atu lea, “Mea, aua lava e te saunoa faapena.
E te le faatauvaa. Ua sili atu i fetu o le lagi lau vaai ia te oe. Ua sili atu foi i manu felelei o le vaomaoa o loo felelei solo ma iloa le lalelei o le lalolagi o le foafoaga ma mea matagofie o iai”.
Na fai lava tala a le tama ma oomi le lima o le teine, na faigofie ai ona asa atu le ala e tau i neura o lona tino. Na tuu i lalo e le tama lana ipu meaai ma fai mai ua maona, ona tei a lea ua faaselemutu atu ai ma le ai a Maumea. Ua inu a la vaiinu ae tuu i lalo o le nofoa i le pito i tua o le la taavale ia tagapepa ua toe fafao i ai meaai o loo totoe, ona faafesagai lea o o la mata ma faaauau le la talanoaga. “Tala, o le a ea le uiga o nei saunoaga ua e fai mai? E sili lava le ta o ese atu ma le fanua lenei ae ua manino mai le mata o le vai aua ou te musu i se mea e manino mai luga ae vilivili lalo”. “Ioe Mea, ua tumu le utu i manatu fia faaali atu, ae ua seumatamuli le tagata e faaleo ina nei avea le maasiasi ma uo i aso uma.
Ua fougata foi aua ou te musu ina nei e faamasino i le tuanai o le olaga, ona fai lea o ni ou uiga leaga ma pa pupuni o le olaga ua suia ma se mea lelei ua faia e le Atua e pei ona ou fia faasoa atu”.
E talanoa mai Tala i ana faasoloupu ae ua gau le loto o Maumea. I lona loto, ua ia faamaonia ai le moni o tala uma e pei ona fai mai e le alii o Tala.
“Tala, vaai oe, ua liusuavaia lou loto i au faaupuga. Ua ou iloa foi le moni ma le faamaoni o vaega uma e pei ona e talanoa mai ai. Aua foi nei e faapea ou te toe manatuaina le ananafi o lou olaga. O se fiafiaga sili lea i lou loto aua ua ou vaaia le suia o ou uiga tuai e fai ma fetu pupula i le lumanai. A mea o le sae na o faigamea o le leaga e liua e avea ma lelei. Ae lelei le fai mai sao o au tala pe o le a se mea o e manao i ai”.
Na pei e nofo le manava a le alii ina ua tau tonu i lona mafaufau le tala a le teine. Na punou i lalo Tala ona melotagi lea. Ua ia sii ae le pito tulimanu o lona ofutino ona fogi lea o lona isu, o le faailoga o le tagata ua ulufia e le anoanoai o mau lagona. Ua ea i luga ona toe faasaga atu lea i le teine ma faapea atu.
“Mea, faafetai lava i lou manatu mai. Faafetai foi i lou finagalo malamalama, aua ua foua lou atamai e lagona o le upuesea talu ai le faigata ona faataoto atu o sou manao. Ae vaai oe, o loo molimau le lagi i lau tala lenei.
O le upu moni ua avaga lou lou loto ia te oe. Ua ou iloa foi le naunau atu o lou agaga i se mafutaga faauo ma oe le tausala. Ae o le a le afaina lea pe a le tusa ai ma sou finagalo, ona ou te malamalama foi. O lea foi ou te iloa o loo iai i Niu Sila le o loo e alofa i ai. Ae o le tala lava i le tusioti le faamaoni mai o Mativa i le lua mafutaga pe leai, aua e leai se isi o iloa atu ana ia foi mea o loo fai. Ae aumaia lau faautautaga pe o fea o taoto ai lou finagalo”.
Na uma atu upu a Tala ona liliu lea o le teine ma faasaga i fafo. Ua oo i lona loto le ootia ona o toe upu a Tala lea na fai ane e uiga ia Mativa. Ua ia faasaoina lea faamatalaga aua e lei maua mai lava se tala ia Mativa pe o a mai lana malaga. E oo lava foi i se vili mai e talanoa ma momoli mai ni alofa ua matua leai lava. Ua maligi loimata o Maumea ona toe faasaga lea i totonu, ae tago ane le tama ua po po lona tauau. Mea, faamagalo mai au pe afai ua tiga lou finagalo ona o sau tala. E fai mai lava tala a le tama ma faalatalata ane lava ona foliga i mata o le teine, ma na fai lea ma ala o le suamili o lagona pupuna ae o le tino ma iu ai lava ina fepaiai o la laugutu.
Na fai si umi o la feasogi i le kisi alofa. Ua leai se tetee atu a le teine i le sasau mai a le tama, ua faapena foi le tama ia i le faamalie o le loto o le teine. O le agi agi malu ane o le savili na atili ai ona pusa lagona o o la tino, a o faitatala ane le fuia sa tu i le laau lea na paka ai i autafa le la taavale i le sisipa ma le sasapa solo o vae o le teine i totonu o le taavale a o femilosai e le alii o Tala i le faatinoina o le kisi. E ui i se naunau o le loto o le tama ina ia sopoia loa le pa i Fualaga, ae ua faataataa mamao lona manao ona o lona manao lava e tau atu i le teine e moni lona alofa.
Peitai o Maumea ua malie i soo se mea. O lona tino ma lona tagata atoa ua pogisa i ai lana vaai ina ua malase le tuinanau o le olaga. O lagona ua leva ona ia momoo i ai talu ona alu ese atu Mativa i Niu Sila, lea ua pei o le saputu ane faafuga o laau le totogo mai i le taeao segi. Ua atili ai ona ia le toe manatua ni mafaufauga lelei ona o le manaia o le fusi ma le kisi feliuliuai a le alii o Tala. Anusa foi nei laulaufaiva ana o ni laulaufaiva sa faatau mai i le faleoloa ua leva ona toe saili nisi laulaufaiva fou.
Ua ave i luga toe ave i lalo, o laugutu ma gutu ua le faavasegaina ni ona tulaga aua ua ai faasoloatoa, ma iu ai lava ina vaivai o la tino ma gase i paau lo la faasasau. “Mea, ua ou iloa lou naunau mai i se mafutaga fia faiaiga ma au. Ae vaai oe, o lou alofa moni ia te oe lea o le a faatili ai le foe aua le ae.
E fai aso le Alii, atonu foi e laulelei se isi nofoaga e faataunuu ai lou naunau mai. Ae lelei ona ta o manu e lei manumalo mai le fili”. Na fai lava tala a le tama o Tala ma tago i le faaola le taavale, ae o le taimi lea ua aapa ane le teine ma toe selu lona ulu aua ua lavelave uma i tamatamailima o le alii o Tala.