Ua ioeina e le atalii o se faafeagaiga o se tasi o ekalesia i Vaitele-fou moliaga o le ave taavale faatamala ua mafua ai le maliu, ma le tago i le foeuli o le taavale e aunoa ma se laisene. O le alii o Aulalo Tulua Peti, e 18 tausaga o Vaitele-fou na ia aveina le taavale na alu ai ma lē ua maliu.
Faaalia e leoleo o lē ua maliu o Lokeni Tavui sa nofo i tua o le taavale sa la‘u ai nofoa, ae na pa‘ū ese lona pulou ma taumafai e avatu ae palasi ese ai loa ma le taavale.
E tolu aso o taofia i le falemai i Motootua mo togafitiga i ni manu‘a i lona ulu, mulimuli ane maliu ai lava.
O le faalavelave lea na faaalia e le suisooupu o le matagaluega o leoleo na ia maua i ai se faamatalaga, ae ua sauni toe sauniga o le alii o Lokeni Tavui, e aunoa ma le logoina o leoleo i le faalavelave na tupu. O lea sa ia faatonuina ai leoleo e faia suesuega ma ia taofi le faia o sauniga mulimuli o le maliu, se‘i maua le mafuaaga tonu o le faalavelave na aafia ai lē ua maliu.
O le mae‘a o suesuega a leoleo, na molia ai loa lē na aveina le taavale, ma faato‘ā faia ai foi ma toe sauniga. Faaalia e le suisooupu le afioga Leaupepe Fatu Pula, soo se tagata lava e aafia le soifua i se faalavelave ae taumafai nisi e natia, e tusa lava po ua fia aso talu ona teu, e toe eli lava i luga lona tino mo suesuega ina ia faia le amiotonu o le tulafono.
