E faatāua tina o le Aiga Sa Talō

E lē o se taimi muamua lenei ua faimeaalofa ai tamā ma fanau o le Mafutaga a Tina o le Aiga Sa Talō mai Faleu i Manono, o loo alaala ma papaaao i Aukilani, e ala i le totogi o pasese o o tina mo se tafaoga i atunuu mamao.

O le tausaga foi e 2009 e pei ona ta‘ua e se sui o le aiga, sa alu ai foi se malaga tafafao a lenei Mafutaga i Iapani. Ae o lea la ua sauni nei tina e to‘a sefulutolu (13) o le Mafutaga, e malaga tafafao i Samoa i le Aso Tofi nei, aso 5 o Me, ma toe taliu mai le aso 16 o le masina nei lava.
Saunoa se sui o le aiga, e leai se faamoemoe patino o faatulaga e faia i Samoa, ae o le faatinoga lava o le agaga faafetai o nai tamā ma fanau, ia latou galuega fita ma tausiga faatina lelei o loo faia i totonu o aiga.

Le ala foi lea o le augofie i lenei meaalofa tāua mo latou, aemaise o le vaitau tonu lenei ua faatāua ai le sao tele o loo faia e tina i totonu o aiga, lea o le a faamanatuina i le aso 8 o Me, le Aso Sa o Tina (Mother’s Day).

O Saleufi i Apia o loo fuafua e faataunuu i ai le malaga, ona taape ai lea i se taimi mulimuli ane e asiasi i aiga i itu eseese o le atunuu i Samoa.

O le afiafi o le Aso Toonai sa faia ai se tuufaatasiga mulimuli a le aumalaga a o lei tuuvaa atu mo Samoa.
O se vaaiga sili ona matagofie, auā na amata ai lava i lea afiafi le faatāuaina faapitoa o tina o le Mafutaga a le Aiga Sa Talō, i le na o le nofonofo o tina ma talatalanoa ma faatali le pueina o lo latou ata, a o pisi mai tamā ma nisi o le fanau i le tunoa i le gaseseina o taumafa o le afiafi.

Na ioe le tusitala i le moni o upu a le tupu o Lemuelu, “O le avā amio lelei, o ai ea se ua maua? e silisili lona tau i penina…E tulai mai lana fanau, ma faafetai ia te ia; o lana tane foi ua vivii ia te ia.”

E iai nisi sui o le Mafutaga ua lē avanoa mo le malaga, ae ua na o le pau ia o i latou o le a faimalaga: Maina Mulipola Leiataua; Monika Misa Robertson; Palepa Malaeulu Faauu; Koleti Suemalo Vitaliano Muaiava; Vainuu Lemi; Paulina Tie; Malia Imakulata Robertson; Lusia Logo Castella; Serafina Vaiao Vetelino; Karameli Vitaliano Tufuga; Eleta Vitaliano Iopu; Pesio Iosefo, ma Toafā Vitaliano.

Talu ai o le a lē auai nei tina i Niu Sila i le aso tonu e pa‘ū i ai le Aso o Tina, ua vave molimoli ai o latou alofaaga ma faamanuiaga i isi tina uma o le Aiga Sa Talō o loo aumau i Ausetalia, aemaise Sister Iosefina Iosefo i Filipaina.

E momoli foi o latou alofaaga i o latou uso a tina o le a faamuli atu, o Toese Tuioti; Sofia Vitaliano; Nila Muliaga; Leoi Leiataua; Matanofo Leiataua, ma Ita Falaniko Toalepai.

Ia manuia le malaga ma maua se faiga malologa fiafia ma aiga i Samoa, ae aua ne‘i galo, o le aso 16 e toe taliu uma mai ai le to‘a sefulutolu, o loo faatalitali atu tamā ma fanau.