“Ua ma tetea lava ma lo‘u toalua ona o le mataupu lenei”
Ua lata i le fitu sefulu tausaga o le soifua o le tamā o Lome Tuala ae ua faatali nei i se faasalaga mo ona moliaga e 2 o le taufaasese ma le taufaavalea (False Pretence) e fesootai ma se vaega tupe e silia i le $10,000 na ia taulimaina mo le faia o ni visa malaga mo le tina o Ramona Manulua ma lona alo sa fuafua e malaga i Niu Sila.
O le tausaga e 2008 i le masina o Oketopa ma Tesema na faia ai fesootaiga a Ramona ma le susuga Lome mo le faia o visa.
Na faamatala le tina i le tusitala i fafo o le fale faamasino, na faailoa atu e lē ua molia o ia e faigaluega i le ofisa o femalagaiga a Niu Sila i Apia ma e leai se mea e popole ai i le avatu o le seleni ma mea uma e na te faia ai o la visa.
Na fiu le tina e tatali le taunuuga o tuugatala ma Lome ae ua tea lava le taimi na fuafua e o ese ai ma Samoa, e lei maua atu lava visa. Na faato‘ā iloa mulimuli ane le mea ua tupu ma le sese o faamatalaga na faailoa atu e Lome, ma sulufai ai loa le tina mo se fesoasoani i le Toomaga mo Tagata Puapuagatia, lea na ave ai le mataupu i leoleo ma faia ai suesuega e pei ona molia ai lea tamā.
O le faaletonu na tulai mai na ta‘ua ai e le tina o Ramona, ua lē toe faatasia ai ma lona toalua o loo aumau i Niu Sila.
“Ua lē fiafia lava lo‘u toalua ma ua lē toe maua ai se ma fesootaiga”, o le faamatalaga lea a Ramona.
O le tasi o moliaga o le taufaasese ma le taufaavalea faasaga ia Lome Tuala, e aafia ai se seleni e $206 tala Samoa. O se tupe a se isi tina e suafa ia Vaimooia o Falealili.
O le tausaga na tea nei na feiloai ai Lome ma lea tina ma le faamoemoe o Vaimooia e fia talosaga sona visa e malaga ai i Amerika.
O le taunuuga foi o lea fesootaiga e lei maua se visa ae ua faaaogā e lē ua molia le seleni. O lē o loo tuuaia ma molia i nei mataupu e lua, sa faauluulu i ai le ofisa o le ECPAT poo le faalapotopotoga e mataitūina sauāga ma faiga matagā e aafia ai fanau i Samoa.
O le ofisa sa i lalo o le maota o le Malo i le eleele fou i le vaega sa iai muamua le ofisa o mataupu tau femalagaiga a le Malo i le Matagaluega a le Palemia.
O loo nofo taofia o ia i le taimi nei i le falepuipui i Tafaigata e faatali ai le suesueina o se isi ona moliaga i le Faamasinoga Maualuga lea e valaauina i le vaiaso nei.
O le Aso Faraile foi o le vaiaso nei e aumai ai se faaiuga a le faamasinoga faaitumalo i ona moliaga o le taufaasese ma le taufaavalea.
Sa teena malosi e Lome Tuala nei moliaga ina ua faato‘ā valaau, peitai o le valaauga i le Aso Faraile na tea nei 26 Novema 2010, na suia ai lana tetee i le ioe.
