I le mae‘a ai ona faalauiloa o ana fuafuaga ina ia fausia se fale tele e sii i ai le supamaketi a Amau i Apia – o lea ua iai se isi fuafuaga o le a vaaia ai le tatala aloaia o le fogafale a lalo o lea faleoloa tele i le faaiuga o le masina nei poo le amataga foi o le masina o Oketopa.
O le faamatalaga a le alii Pule o le Kamupani lenei i Apia, o Komisi Chan Mow, ua iai lea fuafuaga ona ua silia i le to‘a 100 le au faifaatoaga ma i latou sa umia poloka i le maketi o fua o faatoaga i Fugalei ua talosagaina ni avanoa e faatau ai a latou oloa i le vaega i lalo o lenei atinae ua faagasolo le fausia.
O le nofoaga fou lea ua fuafua le sii i ai o le faleoloa tele lenei o le nofoaga lea e i le isi itu auala o le Tuutuu i le Loloto – le Maota tele o le Ekalesia Katoliko lea e i Togafuafua. O gauta atu o le fale fou lenei o le faleaiga o le Sunrise ae e i uta atu le nofoaga ua faamautu ai le fale o oloa sii atoa a le kamupani lava a Amau.
Ua tele masina o fuafua le sii ese o le faleoloa o Amau mai i le nofoaga lea e iai faafesagai ma le Eleele fou (lea sa iai le kamupani a BP). Ae e lei iai se fuafuaga e agai i ai le au faifaatoaga peitai o lea ua ta‘ua e le alii pule ia Komisi, ua toatele lava tagata ua avatu se finagalo e totogi loa a latou poloka e mafai ona faamautu i le fogafale a lalo o le fale tele fou lea.
O le taimi lenei e fai o le lotoā o le atinae a le Queen Poto i Fugalei, lea e pulea ma umia e le Afioga i le Sui Faipule o Toleafoa Faafisi ua matuā faatumulia i le aufaifaatoaga ma le au fai poloka o le maketi, ae ua agai mai i le isi itu o Fugalei, le fanua o le au Vaai ua tumutumu ai foi le isi toatele.
O loo faaauau foi finauga ma le alii Palemia i le lē usitai o tagata fai faatoaga ma le au fai poloka i le finagalo o le malo ua mae‘a ona logoina ai le toatele lenei e agai i Vaitele i le maketi fou, peitai e le o to’atele nisi ua usitaia lea faatonuga ona o le latou mau e lē taulia ai a latou oloa, taugata atili ai le tau o fela‘uaiga ona e mamao Vaitele ma e lē afea gofie le nofoaga o le maketi i lea itu o Faleata ona e tu le pasi ona tau savali lea agai i ga’uta lea uav iai lea nofoaga fou.
E le o iai foi se nofoaga faatali pasi e mafai ona faamalosia ai le afea o le maketi i Vaitele. O le tali a le Alii Palemia ua faalauiloa faasaga i lea “le usitai” o le au faatau sa i Fugalei, e mae‘a loa le galuega tele lea ua fausia ai le maketi tele mo i latou sa i Fugalei ma i latou o loo i Savalalo i le Flea-Market, e lē toe faatagaina lava se tasi ua nofo pea ma faatau ni ana oloa poo fua o faatoaga ia Toleafoa ma Vaai poo se isi lava nofoaga e lei faatagaina e le Malo ona faatau ai a latou oloa.
E ui lava la i nei feeseeseaiga o finagalo, ua faamautu mai nei e Amau le isi nofoaga mo i latou ua t+alosaga atu. Ua faatuina foi e se isi sui faipule, o se alii faipisinisi foi o Pat Ah Him se isi foi nofoaga faapea ae o se nofoaga lē tumau la i tua ane o lana foi pisinisi tele i Fugalei lava mo le anoano ua faaaogā afutafa o le alatele e faatau ai a latou oloa i le taimi lenei.
O le masina fou la e mautinoa e oo atu i ai ua iai le nofoaga fou lenei i le pito i lalo o le fale tele o Amau mo i latou ua faatalosagaina i lea kamupani ni avanoa mo a latou oloa fia faatau atu.
