E avea faatagataotauaina e Nepukanesa sā Iutā ma Tanielu pe ua faatoa sefulu ma le ono ona tausaga.
E ui e talavou, ae sa iloga lona tulaga amanaia i totonu o Papelonia ma fili ai faatupetoa ia aoaoina i tu ma aga faa-Papelonia faatasi ma Mesako, Sataraka ma Apeteniko.
E oo mai i le mataupu e ono o le tusi a Tanielu, le tala e uiga ia Tanielu ma le lafoina i le lua o leona, pe a ma le ivasefulu tausaga le matua ua iai Tanielu. Ua matua ma ua toeaina, ae lē suia ai lava le soifua faatuatua e ui ina fetaiai ma faafitauli i Papelonia.
Ua alofagia e le tupu o Tariu ona o ona uiga tausaafia, ma filifilia ai e fai ma alii sili, faatasi ma le isi toalua latou te vaaia le isi selau luafulu e fai ma alii i le malo.
Ae tulaga ese ai Tanielu ona sa alofagia e le tupu, auā sa iai Ieova ia Tanielu. Sa ave i ai le faamoemoega o le tupu, ae fai ma ala o le lotoleagaina e isi alii sili ma alii o le malo, ma faufau ia fasiotia Tanielu.
O le uiga lea o loo taatele, e loto leaga isi pe a alualu i luma se isi, pe a vaai atu foi ua manuia lena tagata. Ma taumafai ai e fai ni mea e tauvalea ai pe faaleaga ai ona o le loto ua lē lelei.
O uiga ia faa-Papelonia, o uiga o Satani. E tatau ona fiafia i le tulaga o siitia i ai lenei tamā matua o Tanielu, auā e lei iai se mea e faaletonu ai lana auaunaga i tausaga uma sa iai i Papelonia. Ae talofa, sa fetaia‘i ma togafiti leaga a nisi sa latou galulue faatasi.
Ua faamalana‘i le tulafono ma le manatu, ia maua se ila o Tanielu, ia tauleagaina ma ia aveesea mai lona tulaga taualoa ua siitia i ai. Ua taulamalama ma fafau le mailei ina ia tauvalea Tanielu.
Tatou manatunatu i mea faigata ua noatia ai nei Tanielu, ma ua leai se faamoemoe e mafai ai ona faasaoina mai lenei togafiti leaga ua utia ai. Atonu foi o faapea se tulaga o e iai i le taimi nei, ua e lē iloa poo fea e maua ai sou lafitaga, poo se isi e malamalama i tiga o loo e ui ai.
Ua foliga mai ua leai sou faamoemoe, ua peiseai ua punitia le lagi ma ua le tali mai le Atua i au tatalo.
Poo se ma‘i faigata ua toia faafuasei ai oe, ma ua maua mai le lipoti a fomai, ua leai se faamoemoe, toe o nai itu aso poo nai vaiaso ona uma lea o lou soifua. Poo le a lava se mea faigata, ia faapei o Tanielu. O nisi nei o faigata sa feagai ma Tanielu.
• Ua pāsia le tulafono. O lenei tulafono, e leai se isi e mafai ona suia, e oo lava i le tupu o Tariu, e na te le mafai ona suia. Le tulafono ua saisaitia ai Tanielu, ma maua ai le mailei a le fili ia fasiotia ai le tagata faatuatua.
• Ua pupuni le pa o leona i le maa. O ai e manatu e tatau ona pupuni le lua i se maa? O leona e feai, ae ua mausalī manatu ilitata o tagata loto leaga, ia aua lava ne‘i iai se avanoa e sola ai Tanielu. Ua atili ai ona leai se alofaga, ua leai ai ma se faamoemoe e sao mai lenei puapuaga ua la fetaia‘i.
• Ua faamaufaailoga le maa i le mama a le Tupu. Ua toe faaopoopo atu le isi avega ma le isi mailei, ina ia leai, leai, leai lava se faamoemoe e faasaoina mai ai Tanielu. O le faamaufaailoga lea e uma i ai pule, ua aofia i ai le malosi o le tulafono ma le malo, e leai se isi na te aveese le maa. Ua leai foi se avanoa o Tanielu e toe foi mai ai.
E ui i se alofa o le tupu ia Tanielu, ae ua masaa le ipu vai, e oo foi i lana pule ua māmāsagia ona o le loto leaga o tagata.
Sa lei moe lelei le tupu i le popole, ma ala usu i le taeao ma taualaga poo faapefea Tanielu. Sa faateia i le tali ane o Tanielu, sa auina ane e le Atua le agelu ma pupuni i gutu o leona a o fai lana malologa.
Poo e soifua popole ma maua i le lē mautonu, ia faatuatua nei, e auina mai e le Atua lana agelu e fesoasoani ia te oe e pei ona faia ia Tanielu.
Ae afai foi e te lei oo lava i ni faafitauli mamafatū, masalo ua e latalata lava i le taimi e osofaia ai oe e le fili, ae ia faapei o Tanielu.
I totonu o le lua o Leona, sa faatuatua ai pea Tanielu. Tatou te lē iloa, pe sa fai se isi leona ma aluga e taoto i ai le ulu o le tagata faatuatua.
Ae ua mautinoa, sa laveaiina e le Atua Tanielu. Talu mai lava lona talavou, sa tofotofoina ma fetaia‘i ma toatuga o le soifuaga, ae lei liliu lava i sina taimi. Ua mauaa lona faatuatua. E le fefoifoia‘i pe masalosalo i lona Atua.
Samoa, aua e te faatali seiloga e te iai i totonu o puapuaga ona faatoa e tatalo lea. Ia faapei o Tanielu, sa faatuatua mai lava a o talavou.
E masani i le tatalo i aso uma, ma mafuta atu pea lona agaga i le Atua e le aunoa, e ui ina aumau i nuu ese, e lei suia ai lava lona talitonuga i le Atua o Isaraelu.
O se fafagu mo tatou, ma se luitau mo oe ma a‘u, poo a faigata ma le malosi mai o le alii o le lalolagi, ia tatou faapei o Tanielu. Sa faatuatua i le Atua, e lei suia foi lona faalagolago atu i ona aao. Ia faamanuia atu le Atua i lau faitau, soifua.
