O le agaga lea o le faatasiga e pei ona sa faatasitasi ai aiga ma uo, ae lē gata i lea o le mamalu o le atunuu sa auai i le afiafi o le Aso Tofi o le vaiaso na tea nei, lea sa patipatia ai le alofa ma le agalelei o le Atua, ina ua a‘e ma le manuia le faatautaiga a le susuga Papaliitele Lafulafu Peo i lona faailoga tikeri o le Bachelor of Social Work (BSW). Na faaalia e le susuga Papaliitele, o le viiga lava i le Atua le autū o le faamoemoe.
O se sauniga na faatumulia i aiga ma uo ma le mamalu o Samoa sa potopoto. Na muamua ona momoli laau i Fogaa e pei ona avea ai le susuga i le faafeagaiga ia Sepi Paulo ma ositaulaga o le po, ma siitia atu le faafetai i le Atua Soifua.
O le susuga i le faafeagaiga ia Sepi o ia foi lea o le Tamā Faaleagaga a le susuga i le Papaliitele ma lona aiga. Na matagofie lea afiafi i le tele o tapenaga sa saunia, e lē gata i le autalavou a le Ekalesia Halleluiah Worship Center i Otahuhu, ae faapea foi molimau eseese sa fofogaina.
O le susuga i le alii faasalalau lauiloa o le Radio Samoa 1593 AM, le susuga Tavai Meni o ia lea sa fai ma fofoga o le po.
Sa faafiafia ai foi le tofa Pagamalie Iopu Faivalu ma si ona uso le susuga ia Falega, faapea ai ma le susuga Lauama o i latou ia sa nafa ma pesepesega malie i tulaga o faafiafiaga.
O le susuga Papaliitele Lafulafu Peo e lē toe tau faailoaina le tele o lona sao i nai o tatou tagata i Niu Sila nei, aemaise ai lava i Aukilani.
E toatele nisi o aiga ua faamanuiaina ai a latou talosaga i pepa nofomau, o se tautua o loo faia lava e aunoa ma se totogi.
E lē gata foi i lea ae o le toatele o i latou ua mae‘a ona vaetama mai nai o latou aiga mai Samoa e ala i le auaunaga a lenei lava tamalii, ma o isi foi sa talosagaina a latou sitiseni ma faia foi a latou faatautoga i le maota lava o le susuga Papaliitele, ma o ni auaunaga e faia fua e aunoa ma se tapaina o ni totogi.
O le tausaga 2000 sa tulai mai lenei tamalii o se uluai tamafanau o le Pasefika ma Samoa pito i laitiiti na faamanuiaina i le tofiga o le Justice of the Peace (JP), ma e oo mai i le taimi nei o loo avea lava lenei tamalii ma faamanuiaga i le toatele o aiga Samoa i lenei auaunaga, aemaise lava i ē o loo moomia le fesoasoani i le sainia lea o pepa faamaonia e malaga mai ai aiga mai Samoa.
O nisi o aiga ua mafai ona faamanuiaina e ala i penefiti ma tupe maua a le fanau ona o le finau a lenei tamalii, e oo lava foi i le toatele o aiga ua faamanuiaina ma maua fale a le Malo poo le Housing ona o le lē faafiti o le finau a le susuga i le Papaliitele.
Na faaalia e Papaliitele, o lana auaunaga o le faataunuuina lava o le finagalo o le Atua e tusa ai ma le alofa atu i soo se tasi. A uma ona faataunuu ma manuia taumafaiga, ona faafoi lava lea o le viiga i le Atua ae lagona le fiafia o le loto ina ua iloa, ua faia le finagalo a lo tatou Tama.
Na ia faaalia foi, o lana auaunaga e faia lava i le faamaoni, ma a lē manuia lava se faamoemoe e toe faafoi uma lava tupe a tagata. O le tele foi o aiga o loo ia fesoasoani i ai, o aiga lava e mautinoa e mafai ona fai. Afai foi e na te iloaina e lē mafai, e fai sa‘o lava i tagata e sili ai ona faataatia, auā e maimau le taimi e fai ai e lē manuia le tali o a latou taumafaiga.
Faamanuia atu ai foi le pulega ma le aufaigaluega a le Radio Samoa ma le Samoa Times i le susuga Papaliitele Lafulafu Peo mo le faailoga ua faamanuiaina ai. Malo le onosai ma le tauivi!
